Den e promé reunion públiko despues di reseso unda parlamento a diskutí riba e ‘aanwijzing’ i e ‘groeiakkoord’, lider di frakshon di MFK a disidí di los un ‘bòm’ unda e la deklará ku segun un fuente e Hospital Nobo lo bai sak den otro ora e parkeergarage kuminsá yena ku outo.

Segun splikashon di sr. Pisas a koba klep kasi riba nivel di awa i p’esei e edifisio lo bai sak den otro ora e haña peso. Un deklarashon ku naturalmente a laga tur hende sorpresá i ku inkietut. Ta unda sr. Pisas a saka e informashon ei i ku ki intenshon sr. Pisas a lòs e supuesto ‘bòm’ aki?

Awe mainta den un entrevista na Radio MAS arkitekto yu di Kòrsou Lyongo Juliana, ku ta un di e diseñadornan di nos Hospital Nobo, a desbaratá e ponensia di parlamentario Pik Pisas i kit’e kompletamente for di mesa. Sr. Juliana komo eksperto a splika bon kla ku klep ta un di e superfisienan di mas duru ku bo por haña na Kòrsou pa konstruí riba dje.

Tambe sr. Juliana a splika kon e fundeshi di 60 sèntimeter di betòn sólido riba kua e edifisio ta sintá, a wòrdu bashá, i kon den e huki nort e fundeshi a wòrdu hasta reforsá i ankrá. Pues segun sr. Juliana lo no tin nada di sakmentu den otro di e edifisio ora esaki haña peso di outo , ekipo médiko i naturalmente tampoko hende.

Sr. Juliana a splika tambe ku e no ta polítiko pues e mes no por kontesta sr. Pisas polítikamente, pero solamente for di su profeshon ku ta unu tékniko.

Ta p’esei ami komo polítiko sí ta kontesta sr. Pisas polítikamente na e siguiente forma: parlamentario Pisas un biaha mas ta laga pueblo di Kòrsou mira ku e ta iresponsabel i un abusador di marka mayor. Ta sumamente kondenabel lo ke sr. Pisas a hasi den reunion públiko. Sin buska drechi i sin hasi niun investigashon previo, sr. Pisas deliberadamente i den un forma di ‘fake news’ ta trese tenshon den nos komunidat. Tenshon pasó un djis aki lo tin hende ku ta kere den e tipo di fake newsnan aki lo no ke parker den e garashi i lo tin hende ku lo no ke drenta den e Hospital Nobo pasó nan tin miedu ku e edifisio por kolèps riba nan. Lo tin hende ku den futuro lo tin ku bai drumi den hospital nobo lo bai sinti nan mes mas malu ainda pasombra sr. Pisas a disidí di los un ‘bòm’ estilo ‘fake news’. I esaki ku e solo meta di krea spantu, krea tenshon i krea duda den pueblo di Kòrsou pa delaster un kos. Un práktika ku nos a bin ta kustumbrá kuné kaba for di e lider di MFK ku awe ta den blok 6. Ta un lástima ku sr. Pisas awor a tuma e batuta over pa sinta spanta nos pueblo a base di ‘fake news’.

Comments

comments