Walroud (PAR): Errol Cova ta keda bringa Korsou pa interes Venezolano

No a dura ni 3 siman, unda diferente kompania internashonal a entregá nan ‘non-binding proposal’ pa asina por bira operadó di nos refineria, ku ya Errol Cova i su klup Solidaridat Sindikal ta kla pa pone Kòrsou plat atrobe. Anto e biaha aki no bou di e kapa ku mester kore ku Cliff Christiaan, manera tabata e kaso un par di luna pasá, pero awor bou di e kapa ku Cova i su klup Solidaridat Sindikal ta kontra di e plan Groeistrategie i e Groeiakkoord. Ta ken sr. Cova ke kue kabes abou atrobe?

No por ta otro ku e bishita resien na Kòrsou di sr. Quevedo, e hòmber prinsipal di PDVSA i alabes minister di asuntunan petrolero di Venezuela, tabata é okashon unda sr. Cova, komo e hòmber di konfiansa di e gobièrnu Chavista aki na Kòrsou, a risibí instrukshon direkto pa e i su grupo hasi tur loke ta den nan alkanse pa nos refineria keda bou di influensia Venezolano via di PDVSA. I ta netamente esei ta bai pasa den e próksimo dianan. Nada otro. Ta hopi aña kaba sr. Cova ta bringa Kòrsou pa interes Venezolano. Pueblo ojo!

Ojo, paso un biaha mas Kòrsou tin ku di bai sufri bou di e ‘draaiboek’ di Cova. Un biaha mas lo tin blòkiamentu di kareteranan prinsipal, kimamentu di kos, partimentu di wiski na esnan ku ta protesta haña brio i ponementu di mandatarionan bou di preshon formal pa kumpli ku eksigensianan intransigente di Solidaridat Sindikal. No ta promé biaha Kòrsou a pasa den e kosnan aki.

E meta prinsipal di e ‘draaiboek di Cova’ e biaha aki ta pa kita e interes i e ánimo di kualke posibel operadó nobo pa nos refineria i pone e kompanianan aki rekonsiderá mirando ku nos pais ta mustra intrankil, instabil i ku sindikatonan agresivo i intransigente. Ta kua kompania internashonal lo bai hinka plaka den un pais intrankil unda un gobièrnu ta bou di atake sindikal? Ta e mesun táktika aki a wòrdu uzá pa kore ku e ‘preferred bidder’ Motiva. Kòrsou ta bai apoyá ‘draaiboek di sr. Cova’ atrobe pa e biaha aki kore ku tur otro posibel operadó pa nos refineria?

Lo ta sumamente lamentabel ku, faltando 5 luna pa e kontrato di PDVSA vense i posiblemente vense pa semper, pueblo di Kòrsou laga sr. Cova i su klup di Solidaridat Sindikal influensiá e prosesonan di negoshashon ku ta andando negativamente atrobe. No por t’asina ku pueblo di Kòrsou un biaha mas ta laga sr. Cova kita for di Kourou e posibilidat di haña e dil di mas faborabel pa nos refineria. P’esei tambe mi konseho na pueblo di Kòrsou ta pa no kana tras di sr. Cova i laga Kòrsou wòrdu pone plat paso asina nos ta kore e riesgo di pèrdè saku, pèrdè kangreu, pèrdè operadó nobo pa nos refineria, pèrdè groeiakkoord, stanka nos ekonomia i keda man bashí ku solamente sr. Cova i un PDVSA praktikamente bankarota.

Comments

comments