Entre 7:30 y 9:30 am trahadonan a reuni cu sindicato STA, cu autorisacion di gerencia di NV Elmar, pa asina por discuti riba e situacion cu nan ta pasando aden encuanto entregamento di 12.6%.
E hecho aki nan ta sinti cu ta inhusto, mirando cu e otro compania estatal, esta WEB a sa di compensa su trahadonan cu dos dia extra liber pa luna, door di a entrega e 12.6% di nan salario.
Diego de Cuba, presidente di e sindicato a splica cu si bay analisa e companianan cu a haya loonsubsidie, tur hende mester a firma un documento na SVb, unda cu ta bay di acuerdo cu practicamente tin un inkorting di orario di trabao. Pero cu Elmar esaki no a sosode. E trahadonan kier ta solidario, pero kier esaki na un forma mas husto. Loke ta pasando aworaki ta un inhusticia, segun de Cuba.
Awo cu nan kier bay negosha un CAO nobo, gerencia a haya prudente pa para e negociacion, mirando cu e suma negosha ta surpasa 1.4 miyon. De Cuba ta indica tambe cu cada biaha cu tin cu surpasa e suma di ey miyon, gerencia mester pidi autorisacion di Utilities pa na su turno pidi e accionistanan (Gobierno) pa autorisacion, tardando e proceso mas ainda. Segun de Cuba e sistema aki ta anticua y e no ta traha.
Si no yega na un solucion riba e situacion aki, cu un NV ta haya cierto compensacion y e otro no ta haya, e cos aki por desemboca den un accion. Y ta pa e motibo ey ta pidi pa gobierno duna gerencia di Elmar mas autoridad y espacio pa por negosha.
Pa mayor cobertura lesa TREMPAN mañan.
