Walk for paws ta recauda fondo pa Aruba Animal Shelter

6

Walk for Paws ta un proyecto organisa pa un grupo di studiante di Univerty of Aruba, cu tin como meta pa recauda fondo pa Aruba Animal Shelter.

Durante e ultimo simannan e compañeronan di klas; Zia Habibe, Yaella Lopez,  Jo-Anne Noguera, Deandra Arends, Cindy Quintero y Kim Balcera tabata hopi activo bendiendo ticket na diferente localidad.  E actividad ta diadomingo awor dia 14 di april saliendo pa 5’or di atardi for di Fisherman’s Hut na Malmok.

E  organisadornan a scoge Aruba Animal Shelter pa realisa e proyecto aki door cu nan tur tin mascota, cu nan ta duna e cariño y cuido necesario. Nan deseo ta pa no mira niun cacho mas riba caya na Aruba, ya cu e cachonan aki ta termina den e ‘Kill Cage’. E ta un problema  cu e turistanan tambe ta hopi consciente di e animalnan cu ta riba caya, y no ta contento di mira e mascotanan sin un hogar. Por lo tanto no solamente nos como ciudadano ta involucra sino tambe e turistanan. Nan vocifera nan preocupacion  cu e situacion aki y nan a duna e studiantenan nan sosten mientras nan tabata bende ticket cu nan contribucion.

Walk for Paws diadomingo awor ta un ‘fun walk’ di 3K unda por participa cu of sin mascota. Esey kiermen cu bo no mester ta acompaña pa un cacho pa participa na e caminata aki. Ta importante si pa tur doño di cacho tene cuenta pa e mascota ta na un leash. Registracion ta cuminsa pa 4or y mey di atardi y ticket ta na balor di 10 florin pa persona.  Cu e ticket tin e chens pa participa den un rifa unda por gana ‘gift bags’ di Just4Pet  y certificadonan pa pet grooming obsekio di Fluffy Paws Exclusive.  E team di boluntario di Aruba Animal Shelter lo ta presente na e evento pa bende algun mercancia pa recauda fondo. E cachonan lo haya nan treat y awa. Tur persona mester trece nan ticket pa por participa na Walk for Paws  y na e rifa. Aruba Animal Shelter  por haci bon uzo cu e fondonan recauda di  e evento pa entre otro;  sterilisa y castra tanto e pushi-  como e cachonan,  y ademas lo tin mas fondo pa cumpra cuminda pa e animalnan.