Waf na San Nicolas lo no competi cu esunnan na Playa y Barcadera

Recientemente Minister Chris Romero, di e carteranan di Transporte, Comunicacion y Sector Primario, a bishita diferente stacion di radio local pa suministra informacion di e proyecto San Nicolas Port Authorities and Development. “Mi ta hay’e necesario pa mantene nos comunidad debidamente informa di tur e desaroyonan tumando luga rond di San Nicolas Port Authorities and Development. P’esey mi a tuma e iniciativa pa bishita radionan pa comparti e plannan progresista cu Gabinete Wever-Croes tin pa San Nicolas”, tabata palabranan di Minister Chris Romero.

E proyecto di San Nicolas Port Authorities and Development ta hopi prometedor pa San Nicolas y Aruba completo. No solamente e lo ta e entidad pa controla e desaroyo y operacion di e Fast Ferry, pero tambe lo ta trahando man den man cu diferente desaroyadornan pa trece proyectonan positivo cu lo impulsa e economia di San Nicolas.

“Tin diferente tereno na San Nicolas cu a bira propiedad di Pais Aruba atrobe y pa cu esakinan tin hopi interes di diferente inversionistanan pa desaroya proyectonan prometedor na San Nicolas”, Minister Romero a enfatisa.

No ta intencion pa San Nicolas Port Authorities and Development competi cu ningun otro compania. “E intencion no ta pa San Nicolas Port Authorities and Development haci e trabou cu APA ta bin ta desplegando eficientemente den tur e añanan aki, pero mas tanto e lo complementa nan trabou pa cu e waf na San Nicolas. Pero pa tur esaki por pasa, Parlamento lo mester aproba e ley. Tur esaki ta den preparacion caba y e intencion ta pa Parlamento trata e ley di San Nicolas Port Authorities and Development prome cu reces, pa continua cu e siguiente pasonan pa cu e gran proyecto aki”, Minister Chris Romero a finalisa bisando.

Comments

comments