Vivienda cu a tene accion tabata manera un Drive Thru di droga

Diasabra merdia Departmento di Droga UGC di Cuerpo Policial, a tene un razzia entre Ranchostraat y Johan de Windstraat, e vivienda aki tabata tin algun hende ta biba aden, ta bende droga diariamente na adictonan ambulante, na otro tipo di hende. E tabata manera un Drive Thru. Pa polis esaki a bira un tiki dimas y mester a pone un paro a dje di biaha.

Esaki ta un di e accionnan cu ta bay sigui tambe.

Kico ta spera di parti di autoridadnan mas halto

Alto Comisario di Polis, Andrew Hoo, a splica cu nos sistema hudicial awo, tin cu bay haci nan huiswerk. Tin dos cos ta core. E parti cu polis ta haci y despues nos sistema hudicial tin cu bay funciona awo y tene e hendenan aki cera.

Contacto

Alto Comisario Hoo a comenta cu semper en cuando cu por keda anonimo, bo por yama e tiplijn. Tin tur sorto di manera pa yama polis. Por yama cualkier warda, geef door y polis mes tambe ta compilando su informacionnan.

Señal

Señalnan cu hende por mira ta hendenan straño cu ta bin diariamente, sea cu ta anochi, merdia, mainta, bo ta mira autonan ta bin cu no ta pertenece na e bario, hendenan ta bin na pia. Esey ta algun señal cu e luga ta bende droga.

Reaccion di pueblo

Aruba tin yen di ciudadano cu ta bon di curason y nan tin Aruba na pecho. Tur cos cu ta ilegal y ta malo, nan ta meld. Polis tin confiansa den pueblo y Cuerpo Policial ta spera di haya cooperacion di pueblo pa yuda combati ilegalidad.

Investigacion

Investigacionnan ta wordo haci prome. No ta bay a lo loco drenta den cualkier cas. A base di informacionnan cu haya ta wak ki risico tin pa polis y recherchenan pa nan drenta. Mas halto e riesgo ta, cu mas cautela ta drenta. E biaha a scoge pa drenta cu arestatieteam, Alto Comisario Hoo a splica.