Vishon: ‘Si nos ke un mihó Kòrsou e hende mester ta pará sentral!’

E presentashon di djasabra último ku tabat’in komo tema “Transformá e mente i e hende” presentá pa Yithza Davelaar, tabata un éksito rotundo. Dilanti un sala yená ku bishitante (kumpliendo ku tur regla relatá na prevenshon di COVID-19) Yithza a para ketu na e individuo.

Kòrsou ta degenerando ora nos wak rònt di nos. Norma i balornan a baha. Si nos ke un mihó futuro pa Kòrsou, nos tin ku pone e hende bèk sentral. Pa hopi aña kaba a neglishá e hende, anto e efekto negativo ta bisto. Komo hende nos ta tumando desishonnan ku no ta benefisiá ni nos mes bida, nos komunidat, ni nos país.  Yithza a para ketu na e echo ku nos desishonnan ta basá riba nos kreensianan, ku otro palabra nos ‘mindset’. Si nos kier hisa nivel di nos país, nos tin ku enfoká riba e ‘mindset’ di kada individuo. Nos ‘mindset’ ta wòrdu formá dor di nos edukashon na kas, nos enseñansa na skol, nos sírkulo di amistat, nos media i bukinan ku nos ta lesa.

Durante e presentashon Yithza a kontinuá na splika ku VISHON ta mira e tres pilarnan ‘Enseñansa’, ‘Desaroyo Ekonómiko’ i ‘Desaroyo Sosial’, komo e fundeshi di nos país. Un fundeshi ku nos tin ku bai traha duru riba dje. I ta netamente akinan e hende mester ta pará sentral. Nos enseñansa ta konsistí di nos maestronan di skol i hobennan. Nos ekonomia no por drai sin kontribushon di nos hendenan. I pa loke ta trata e aspekto sosial nos barionan ta esensial pa por disfrutá di nos bida na un nivel digno.

Ta insólito pa pretendé di ke un mihó futuro pa Kòrsou, neglishando nos maestronan di skol, nos trahadónan i famianan den bario. Edukashon mester ta é liña kòrá den tur tres pilar. I no edukashon pa un dia so. Pero lokual nos ta yama na ingles ‘lifelong learning’ un edukashon kontinuo pa un i tur.

Banda di e ròl ku gobièrnu tin pa fasilitá pa por logra e metanan ariba menshoná, e hende mes tambe tin e responsabilidat pa tuma rienda di su mes bida. Kada persona ta responsabel pa bira e mihó vershon di su mes, dor di pone enfoke riba su desaroyo. 

Yithza a finalisá bisando ku nos mester traha riba Yunan di Kòrsou ku ta íntegro, responsabel, respetuoso i ekselente. VISHON so no por hasi esaki. P’esei e ta hasi un yamada na tur Yu di Kòrsou pa karga e vishon aki huntu kuné.

Por wak e presentashon di “Transformá e mente i e hende” bèk riba página di Facebook di Yithza Davelaar i VISHON.