Vishon: Nesesidat di pueblo mester kede sentralisá den bario

“Mi desishon pa drenta polítika no tabata un pa fama.’’ Den e edishon mas resien di ‘#MilesAhead’ ayera nochi e lider di partido VISHON, Miles Mercera, a entrevistá Vishonario Germône de Lima. Germône ta konosí komo un persona skèrpi ku den transkurso di añanan a pone su stèmpel komo un periodista profeshonal i investigadó krítiko. Resientemente, durante un edishon di notisia na TV Direct 13, Germône a anunsiá su desishon pa retirá den su funshon komo periodista i drenta polítika. Huntu ku VISHON e tin un plan realístiko pa duna aporte konstruktivo na desaroyo di pueblo di Kòrsou.

Den e entrevista por a sera konosí ku un otro banda di Germône, kaminda e ta splika ku den transkurso di añanan komo periodista i profeshonal den lei e por a eksperensiá di aserka kiko ta biba den pueblo, i kiko e nesesidatnan ta. Mester pone muchu mas atenshon na entre otro nos muchanan i nos grandinan den bario. Tin hopi trabou ainda den nos barionan pa yega na un nivel kaminda nos por motivá i inspirá nos hóbennan pa progresá den bida. Pa logra esaki mester invertí muchu mas den desaroyo sosial. Lástimamente e rekursonan pa logra esaki ainda ta sumamente limitá.

“Mi no ta kere den populismo, mi ta kere den konsistensia riba loke bo ta bisa i hasi algu realístiko pa para tras di bo palabranan, i esei ta un di e motibunan pakiko mi ta den VISHON. Mi lo usa mi konosementu i ekspertisio pa adelanto di e mesun hendenan ku a sigui mi den transkurso di añanan.’’

De Lima ta splika ku VISHON ta un grupo di hende ku mente fresku ku ta kere den adelantonan riba término largu pa nos Pais. Mester bini ku forma di hasi polítika nobo pa por trese kambio nobo.

Germône ta sigui splika ku e ke ta un líder i a tuma e kurashi pa no keda pará na banda mas i reportá so, pero realmente duna un kontribushon, pa ta é bos pa e personanan ku mas tin mester di dje. El a komprometé su mes ku, komo Vishonario, e ta keda meskos. Un persona humilde ku amor pa hende. “Nan por spera ku mi sinseridat i humildat lo ta un aporte pa ta un bon representante di pueblo”.

Despues di e entrevista, Miles Mercera a bisa ku e ta sumamente kontentu di por yama Germône bon biní komo Vishonario. Komo Vishonario Germône lo empeñá pa kombatí pobresa, desaroyo sosial i un desaroyo integral di nos barionan.

VISHON ta enfoká riba tres pilar: Desaroyo Ekonómiko, Enseñansa i Desaroyo Sosial. Ku VISHON den un gobièrnu, Kòrsou por konta ku un mihó futuro.