E decision di Gobierno di Reino Hulandes, pa impone un Visa pa tur Venezolano pa Aruba, Boneiro, Corsou, Sint Maarten, Saba y Sint Eustatius entrante dia 1 di april 2020, ta posponi te cu un proximo aviso. Esey Minister di Relacionnan Exterior di Reino Hulandes, Stef Blok, a comunica dia 27 di maart ultimo na Parlamento Hulandes, den un carta bou di e referencia BZDOC-504293068-17.
Parce cu e retonan nobo cu a presenta dor di e crisis rond di Coronavirus, a haci cu rond mundo a bin adaptacion den manehonan. Gobierno di Reino Hulandes a manda informa Parlamento dia 2 di october 2019 di su decision pa impone VISA pa Venezolanonan desde 1 di april 2020. Pero mirando e retonan cu tanto Hulanda mes, pero tambe Venezuela tin rond di e crisis aki, ta haci imposibel pa keda cla cu su introduccion den forma logistico y organisatorio.
Cu e realidad aki riba mesa, Gobierno di Hulanda a palabra cu Gobierno di Aruba, pues cu Minister Presidente Evelyn Wever-Croes y Minister Andin Bikker, pa pospone introduccion di e Visa aki te cu proximo aviso. Di otro banda mester menciona cu e espacio aereo cu tur pais ta cera na e momento aki y separa di esey esun cu Venezuela lo sigui cera. Djis cu pa ora habri Aeropuerto atrobe, cu Venezolanonan por sigui yega Aruba numa for di Colombia, Panama of for di otro pais.
