Na Kòrsou tin pa luna mas o ménos 10 kaso di hende muhé,mama nan ku yu, hobensita nan ku ta wòrdu saka for di nan kas i aloká na adrèsnan deskonosí pa motibu di violensia doméstiko/relashonal dor di nan partnernan sin konta e kantidat di hende muhé ku ta wòrdu maltratá ku no ta hasi uso di e “eskape” aki. Dia 25 novèmber próksimamente Nashonnan Uni ta para ketu pa konsientisá riba e tema violensia (doméstiko, relashonal i laboral) kontra di hende muhé i hobensita.Violensia kontra di hende muhé ta un konsekuensia direkto di diskriminashon di hende muhé i mustra klaramente e desigualdat ku tin entre hòmber i muhé. E kantidat di 10 kaso di hende muhénan víktima di violensia doméstiko òf relashonal pa luna ku mester sali for di nan kas pa motibu di violensia pa aña ta suma na 120 ku ta demasiado haltu i inakseptabel pa un pais di 160 mil habitante.E sifranan aki ta di e víktima nan ku realmente ta haña yudansa ora nan hasi keho na polis i despues asistensia na instansianan konserní.Lamentabel ta ku ainda tin hopi hende muhé pa diferente motibunan sosial , ekonómiko,bèrgwensa i miedu no ta hasi òf ta hasi keho pero òf ta siguí koperá pa ku Polis ku e kaso kontra di e agresor, ku e resultado ku nan ta keda biba bou di e situashon horibel aki. Den kuadro di esaki i mirando desaroyo Mundial riba igualdat di género pa logra Social Development Goals #5, banda di empoderá e hende muhénan/hobensita riba e tema aki ,tambe mester introdusí e sistema unda nan kehonan ta wòrdu atendé dor di damanan Polis na momento ku un hende muhé òf hobensita bin hasi un keho i no Polis hòmber manera mayoria biaha ta e kaso. Esaki lo mester yuda pa baha e drèmpel di e tantísimo hende muhé nan ku no ta hasi keho.Tambe ta mira e tendensia pa atendé violensia doméstiko di kasa/partnernan di kuerponan uniformá manera Polis i Duana ,unda e kehonan di violensia di hende muhé aki ta wòrdu trata dor un otro instansia ku no tin ningun laso ku kuerponan uniformá unda e muhé por haña realmente un trato igual.Maltrato di hende muhé ta un di e faktornan ku tin un impakto negativo riba diferente tereno e desaroyo di un pais.Dor di e situashon aki e muhé no por laborá optimal i e yunan no por studia optimal i ta lanta ku tur tipo di trouma ku lo afektá su bida i di su famia den futuro ku i asina kontribuí na pobresa segun investigashon di Nashonnan Uni.E dia aki ta sumamente importante pa para ketu i wak kon nos ta bai empoderá nos hende muhénan/hobensitanan.Na mi humilde opinion gobièrnu mester inisiá un trayekto konhuntamente ku e fundashonnan di hende muhé i skolnan pa kuminsá eduká nos hóbennan den kuadro di igualdat di género I asina yega un dia ku nos por yega di logra e SDG #5 igualdat di género den e pais aki.
Relashoná ku esaki parlamentario sra Giselle Mc William a hasi minister di hustisia e siguiente preguntanan:
Kuantu keho di violensia di hende muhé /hobensita ta keda registrá anualmente?
Kuantu di kehonan aki realmente ta wòrdu realmente efektuá?
Kuantu kaso a keda registrá anualmente den kual polis mester a intermediá den kaso di maltrato doméstiko.
Kiko ta e motibunan ku e kehonan no ta wòrdu konkretisá?
Kuantu kaso di violensia di kasa/partnernan di kuerpo nan uniformá ta wòrdu registrá?
Kuantu di e kehonan aki realmente ta keda konkretisá?
Ta posibel pa laga Polis hende muhé atendé ku kehonan di violensia di e hende muhénan?
Ta posibel ku kehonan di violensia doméstiko/relashonal di kuerponan uniformá por wòrdu atendé dor di un otro instansia?
Kon ta protehá e víktima di maltrato doméstiko pa evitá ku e akto ta ripití?
Kon polis ta atendé ku un kaso di maltrato doméstiko den kual e víktima no ke duna keho?
Kiko ta e prosedura den e kuadro hudisial na momentu ku un mucha menor di edat bira víktima di maltrato doméstiko?
