Violencia domestico fatal: Castigo di 7 aña di prizon ta colga riba cabes di Roy Croes

Aunke famia di e defunto a spera mas castigo pa e homber cu a maltrata nan ser keri aña den-aña afo, toch Fiscal a pidi solamente 7 aña di prizon pa violencia domestico fatal. E reto cu Ministerio Publico a confronta ta e hecho cu no a logra prueba asesinato (premedita) sino solamente homicidio (doodslag).

Na augustus 2018 violencia domestico a yega su punto mas halto na Aruba cu fayecimento di Anushka Tromp. Despues di un periodo largo di maltrato, esaki a caba cu su bida. E sospechoso responsabel ta su pareha Roy Croes, kende diabierna ultimo a aparece dilanti mesa berde pa atende e caso penal contra dje. E caso a tuma luga simultaneamente cu e sentencianan cayendo den e otro sala, den e caso IBIS.

Anushka Tromp a fayece na edad di 48 aña, lagando 2 yiu muhe atras mas 2 yiu sin dolor.

Ta acusa e homber Roy Croes di a tuma bida di Anushka Tromp riba dia 5 di augustus 2018 dor di dal’e varios biaha cu forsa di mokete na cabes, cu consecuencia cu e victima a sufri lesionnan grave y a fayece.

Roy Croes a mustra arepentimento

Durante tratamento di e caso, na diferente ocasion, Roy Croes a expresa arepentimento y duele di loke cu a pasa. El a sigura Hues cu su intencion no tabata pa kita bida di su pareha. Pero Fiscal a bisa cu e slanan tabata asina fuerte cu el a causa un sangramento interno pisa cu no por a controla y na final a kita bida di Anushka.

Demanda di Fiscal

Fiscal despues di a repasa e caso a dicidi di pidi un castigo di 7 aña incondicional. Esaki probablemente pasobra pa Ministerio Publico loke ta proba tabata maltrato pisa cu morto como consecuencia. No por a proba cu el a haci esey cu intencion di mat’e.

Homicidio vs Asesinato

Hopi biaha publico ta confundi entre e dos terminonan aki. Homicidio ta locual ta yama na Hulandes “doodslag”. Esey ta dos persona bringando y dado momento e pelea ta sali for di man y un di e bringadonan ta fayece. E ta un situacion spontaneo y for di control.

Den caso di asesinato, cu na Hulandes ta yama “moord” tin e aspecto di “premedita” den dje. Esey ta ora un di e bringadonan ta sali dor di su cas cu un cuchiu den saco of un pistool cu e plan pa mata su contrincante. Den un caso asina Hues ta considera un castigo mas pisa pasobra ta un matamento planea ta papiando di dje e ora.

Nivel di castigo ora di homicidio

Un castigo di 7 aña pa homicidio ta “normal”, asina un abogado conoci pa bringa casonan penal a sigura na nos. Berdad ta cu ley ta bay te cu un maximo di 15 aña pero masha poco sa aplica e tipo di castigonan asina. Tin varios otro homicidio mas di cual a pidi e mesun castigo y Hues a bay di acuerdo cu nan. Esey ta bira custumber na dado momento y ta uz’e como un “strafmaat”. Den caso di asesinato ta uza un castigo mas halto, pasobra ey por bay te cu 30 aña mes y si e ta hopi pisa, cu factornan di sufrimento prome den forma di un atrosidad, lo por bay te na bida largo mes.

Pero den caso di homicidio, Corte ta aplica normal un castigo di 7 aña y si e ta hopi pisa, por desvia y bay te cu 10 aña di prizon. No ta corda cu den e ultimo decadanan aki a aplica e castigo maximo di 15 aña pa un caso di homicidio. Claro cu e ultimo palabra semper ta den man di e Hues, cu por scoge pa desvia for di e demanda di Fiscal, sea e por baha e demanda of hasta subi’e!

Sentencia

Kico Corte ta pensa di e caso aki lo tende dia 15 di maart awor ora cu duna sentencia.