E hoben Elyze Jean cu na luna di october ultimo a core pa Polis y cu den e persecucion a cay y herida su mes seriamente, ta bek na Aruba. E tempo ey a transport’e cu urgencia pa Bogota, Colombia, pa eynan el a haya tratamento medico avansa. El a haya hopi sla na cara y cabes, cu consecuencia cu na Aruba no tin e specialisacion adecua pa por brind’e e cuido necesario. Despues di basta tempo interna na Colombia, recientemente e ta bek na Aruba y ta na cas, pues no ta interna mas.
Su bida a cambia si por lo pronto, pasobra durante e operacion cu a realisa riba dje na Bogota, a uza como 30 schroef den su cara, pa por tene su cara hunto. Dor di e impacto, unda el a dal den rand di e acera na e rotonde di Sero Patrishi, el a haya sla na cara, a kibra su kaak, su cashi di wowo y su nanishi.
Circunstancia personal di e victima
Elyze Jean ta naci na Haiti, pero ta na Aruba desde edad masha chikito caba. Su mama a fayece ora e tabata hopi jong, pues no conoce masha. El a bin Aruba cu su tata hunto cu tres ruman mas. Ainda nan tin 2 ruman mas bibando den exterior. El a bay scol basico na Aruba y scol secundario. A haya su permiso di estadia den e proyecto di “Dreamers” implementa dor di DIMAS pa tur cu a bay scol na Aruba pero tabata ilegal.
Mientrastanto ta cu AO
Pa un periodo basta largo ainda e lo no por traha, debi na e proceso di recuperacion cu e ta pasando aden awo. Dokter di SVb a dun’e un periodo largo di descanso pa e operacion por cura y por logra tene e cara bek hunto. Elyze Jean ta traha como contratista na DOW pa basta tempo caba y ta conoci como un bon trahado.
Victima of sospechoso?
Kico su status penal ta awor, e mes no sa. Nunca Polis a yega mas cerca dje, ni pa bis’e cu e ta sospechoso pa core pa Polis ni pa puntr’e con a bay cu su operacion despues cu Polis Wester a persigui’e riba brommer te cu el a cay den e persecucion. Hecho ta si cu a bay Polis pa entrega keho contra e Polisnan cu a persigui’e e anochi ey. Pero a keda bir’e di tur banda sin cu te dia di awe a tuma e keho oficial. Riba dje, amistadnan a acerca e tres of cuater testigonan cu a mira tur locual a sosode y sa cu e Polisnan tabata robes e anochi ey, cu awor a hala atras y no kier para testigo mas pa evita problema. Famianan di Jean ta convenci cu aki ta trata di intimidacion policial, pa evita cu e berdad ta bin afo.
E caminda ta largo, pero lo can’e
Pa e amigonan di Elyze Jean, e caso aki lo no keda asina. No por ta asina cu Polis por imagia cu pasobra e hoben aki ta Haitiano, cu su derechonan ta menos cu esun di e Polis envolvi. Nan lo sigui haci tur lo posibel y lo bay directamente na Ministerio Publico of na Minister Andin Bikker pa demanda un investigacion imparcial. Lo no desea pa Polis mes investiga nan mes, sino pa laga un organo separa investiga e Polisnan cu a traha e anochi ey y cu tabata envolvi den e persecucion. E victima ta papia cu Polis a skop’e abou na suela ainda mientras e tabata mal herida. E kibramento di kaak, cashi di wowo, nanishi, etc. no necesariamente ta dor cu el a cay cu brommer, sino di e paranda di skop cu el a haya di e grupo di Polis cu hunto a maltrat’e siendo herida benta abou na suela.
