Victima di intoxicacion: Jessica Sousa y Joslyn van der Linden ta luchando pa nan bida

43373

Pa famia esaki ta un sla duro. Prome pasobra dos famia a meldo na Polis cu nan ser keri ta perdi, pero a tende cu mester warda. Despues ta haya e tristo noticia cu a haya nan benta for di tino den un bar na San Nicolas y cu nan ta intoxica. Un di nan ta interna den cuido intensivo (ICU) y ta den coma, mientras cu e otro ta recuperando pocopoco pero no ta corda nada.

Por lo menos un di e victimanan a bisa famia cu e ta corda cu diamars manece diaranson pa 2:00am, nan tabata den Latin Passion Bar y el a bisa su amiga cu nan mester bay cas. Di eynan e no ta corda nada mas. Awe marduga el a spierta den Hospital y e ta sinti cu e tin sla na su curpa. Pero como cu e no ta corda nada, e mes no sa kico a sosode cu nan ainda.

https://www.facebook.com/24ora/videos/617575215560375

Jessica Vanessa Sousa di 31 aña di edad a pasa busca Joslyn van der Linden di 23 aña di edad diamars anochi na cas di su mama. Nan a bay sali y trip entre otro en Latin Passion Bar na San Nicolas. Nan no a bolbe cas mas. Logicamente famia a cuminsa preocupa y ora cu un tanta for di Hulanda a yama e tata di Joslyn, mesora el a cuminsa move pa busca paradero di su yiu. E yiu ta biba cerca e mama. Tanto Joslyn como Vanessa ta bisiña di otro na Savaneta.

Den e auto di Vanessa nan a bay trip y Joslyn a laga su auto na cas. Algo a sosode cu nan no a logra bandona Latin Passion Bar. E tata di Joslyn a bay Polis despues cu a notific’e cu su yiu no a yega cas desde e dia anterior. Pero manera semper y segun procedura, Polis ta bisa Bo pa warda 48 ora prome cu oficialmente por anuncia cu nan ta perdi.

Victimanan yegando Hospital. Un ta den coma interna den ICU mientras e otro ta interna pa observacion.

E tata a avisa un amigo Polis cu mester a subi warda na San Nicolas. Asina mes e tata a topa cu e auto di e amiga cu a bay cu su yiu para dilanti di Latin Passion Bar. El a saca potret di e auto para eynan y sigui su caminda. E no a pensa nunca cu su yiu ta casi morto paden den e bar.

Tabata net prome cu mey anochi cu e mama a yam’e bis’e di e noticia tristo y el a move mesora. Despues el a bay Hospital caminda e tabata sigui proceso di e tratamento cu tabata wordo duna na su yiu. Te cu marduga ambos tabata for di tino. Tanto Vanessa como Joslyn a pasa e proceso di scan curpa y cabes pa asina mira con serio nan situacion ta.

Comandante di Cuerpo di Bombero, ing. Edward “Dido” de Cuba den entrevista awe marduga for di e incidente. El a splica cu e huma cu e generator ta produci ta masha peligroso y por ta fatal.

Mientrastanto slachtofferhulp ta esun cu tabata comunica cu e famia directo di e victimanan. E no tabata facil pa e famia. Ta scuchando tambe diferente version awor aki di e sucedido. Naturalmente Polis mester investiga.

Joslyn van der Linden tin dos yiu y Jessica Vanessa Sousa tin tres yiu. Ta desea ambos un pronto recuperacion y cu pronto nan ta bon bek pa sigui cu nan yiunan y nan famia.