Diadomingo marduga a yega dos homber na Spoedeisende Hulp na Dr. Horacio E. Oduber Hospital, cu varios hinca na nan curpa. Parce cu nan a bira victima di un hincamento na Madiki, pero e trece nan cu auto particular pa Hospital. Por lo menos un di e victimanan tabata seriamente herida, pero ta optando pa mantene silencio y no kier bisa nada di e caso.
Di acuerdo cu nos informacionnan, esun interna tin apenas 24 aña di edad. Su fam ta Penha, pero mucho informacion e no ta dunando. E ta bisa di tin 4 aña ilegal na Aruba y tin miedo nan bin buske eyden.
Ta precisamente dor di e hecho aki, Penha a opta pa no contesta preguntanan y no kier papia. E no kier bisa ken a hink’e, ni dicon y pio na unda. Tur esaki pa motibo cu e ta ilegal. E no kier ni duna su nomber completo.
Mester menciona cu separa cu e tin un pulmon perfora, e tin un debe cuantioso na Hospital. El a keda dos dia den Intensive Care Unit, cu ta costa 6 mil florin pa cada dia. Ainda ta bin remedinan acerca y tur e testnan cu mester realisa den Hospital. A bahe entretanto di ICU pa camber regular. Su situacion ta stabiel.
Autoridadnan ta sospecha cu ta trata aki di un caso serio debi cu e victima ta teme masha cu nan lo bin pe den Hospital. A laga pone siguridad extra pe, mientras cu autoridadnan ta sigui investiga e caso straño aki. Ta obvio cu esun cu a hink’e varios biaha cu cuchiu tabatin intencion serio di likid’e. E pregunta ta dicon?
Mientras cu Polis ta investigando pa haya contesta riba nan preguntanan, e demas autoridadnan ta pendiente su mehoracion pa regla su deportacion for di nos isla.
