Atraco Team durante investigacion a yega na un conclusion cu e atraco cu tabatin den Companashi tin di haber cu e mesun supuesto victima di e atraco! Pesey mes a detene e dama cu a ser atraca na e oficina di number. E ta traha eynan. Ta trata di e dama J. Brito di 26 aña di edad.
Dos biaha ora cu tabatin un bon cantidad di placa, diripiente un atracado ta drenta bay cu e suma di benta. Den ambos caso a papia di arma cu cuchiu. Despues di basta investigacion rond di e caso a bay over na detene sospechosonan den marduga.
Despues di interogacion a bay over awor tambe na detene e propio bendedo di number. Ta sospech’e di tabata envolvi den atraco riba su mes pa asina logra horta e placa di benta of premionan di dia di otro cliente.
Ayera diabierna atardi Recherchenan di Atraco Team a detene na e mesun oficina di number ora cu el a bay traha. A hib’e oficina di Recherche di Atraco Team unda el a pasa e prome parti di interogacion y djey a encarcel’e na Warda di Polis di Noord pendiente e investigacion. A consecuencia di e detencion aki, e oficina di number a keda cera henter atardi y anochi. No tabatin benta.
E doño awo mester busca un bendedo nobo pasobra esun existente a cay cera pa atraco. Den cierto forma Brito a pasa di victima pa sospechoso di su mesun atraco.
