Durante nos reciente bishita na Cartagena de las Indias, Colombia, durante e conferencia di Sociedad Interamericana de Prensa, a topa cu Marta Lucia Ramirez, e Vice-presidente di Colombia. Ora el a topa e delegacion di Aruba, el a informa cu e ta namora cu nos isla y cu na varios ocasion a yega di pasa como turista hunto cu su casa. A extende un invitacion na dje, pa ki ora e tin un tempo den su agenda ocupa, cu e ta mas cu “bonbini” na e isla feliz.
E Vice-presidente di e Republica di Colombia, ta e di dos puesto mas halto di poder ehecutivo na Colombia. E Vice-presidente ta eligi riba e mesun fecha y formula cu e Presidente, pa eherce e mesun periodo y ta reemplas’e den su faltanan temporal of absoluto. E funcionnan principal di e Vice-presidente ta determina pa constitucion. Marta Lucia Ramirez ta e actual Vice-presidente, e prome hende muhe cu ta asumi e puesto aki, desde dia 7 di Augustus 2018.
E rol di Vice-presidente
E Vicepresidente tin e funcion constitucional di reemplasa e Presidente den su faltanan temporal of absoluto. Den e caso di e promenan, e Vice-presidente ta posesiona pa eherce e puesto di Presidente di e Republica, cuanto biaha ta necesario, den caos di faltanan absoluto, e Vicepresidente ta asumi e rol di Hefe di estado te finalisa e periodo pa cual a eligi’e. Articulo 202 di e Constitucion Politico di Colombia, tambe ta permiti e Presidente di Republica confia e Vice-presidente den mision of encargonan special y asign’e den cualkier posicion di e puestonan ehecutivo.
