Venezuela ta rechasa respaldo di Union Europeo pa Guaido

Gobierno Venezolano a rechasa enfaticamente e decision di estadonan miembro di Union Europeo pa respalda e lider opositor, Juan Guaidó, como Presidente interino, bisando cu Caracas awo lo revisa su relacion cu e paisnan aki.

Minister di Relacionnan Exterior, Jorge Arreaza, a acusa Union Europeo di somete oficialmente na e strategia Mericano pa deroca Gobierno Venezolano.

E declaracion, cu a expresa e “rechaso mas energico” na e decision di e estadonan di Union Europeo, a agrega cu Gobierno Venezolano awo lo revisa nan relacionnan bilateral cu e paisnan di Union Europeo cu a reconoce Guaidó como e Presidente interino legitimo.

E anuncio di Caracas a tuma luga ora cu Hulanda a uni na Alemania, Inglatera, Francia, Spaña, Suecia, Belgica y Dinamarca na reconoce Guaidó despues di a pidi e Presidente electo constitucionalmente, Nicolas Maduro, pa yama eleccionnan nobo, un peticion cu el a nenga.

Sinembargo no tur den Union Europeo a ofrece un apoyo rotundo na e lider di e Asamblea Nacional. Dialuna, segun informe, Italia a blokia un declaracion di Union Europeo cu ta reconoce Guaidó como e lider legitimo di Venezuela. Irlanda tambe a propone un enfoke mas cauteloso pa loke ta Guaidó, na luga di apoya eleccionnan nobo.

“Nos kier eleccionnan liber y husto pa e ciudadanonan tuma un decision democratico na Venezuela,” asina Minister di Relacionnan Exterior di Irlanda, Simon Coveney, a bisa.