Reto cu vuelonan di Aruba pa hiba of busca hende cu a keda pega

3727

Gobierno a anuncia den su conferencia di prensa cu ta trece Arubianonan di Colombia y despues ta Minister di Husticia a anuncia cu tin vuelo extra pa Venezuela pa saca ilegalnan cu a raporta boluntariamente. Ta parce cu esaki no ta facil pa realisa.

Prome Minister Evelyn Wever Croes den e conferencia di prensa diaranson anochi ainda, tabata hopi breve den su contesta riba e tema aki. “E vuelonan a cancela. Nos ta papiando cu Presidente di Colombia riba e tema.”

Den e maneho cu a pone a dicidi cu despues cu frontera a cera caba, pa pone tres vuelo charter for di Colombia di cual dos mester a yega diaranson y uno diahuebs. Tur esaki a prepara y a busca un aerolinea caba pa realisa e vuelonan aki na momento cu Colombia a prohibi biahamento interno y a cera frontera internacional. Asina mes a cuminsa prepara vuelo y despues di un retraso finalmente a logra haya permiso.

Y hustamente den e mesun conferencia su colega di husticia mr. Andin Bikker a papia di personanan di Venezuela cu tin un status ilegal na Aruba por registra pa nan bay Venezuela. A menciona cu ta bay cuminsa cu dos vuelo riba diahuebs pa saca esnan deporta y tambe tin espacio pa esnan di Venezuela cu kier bay. E hendenan registra ta keda unda nan ta, y lo no wordo deteni.

Sinembargo awe mainta na momento cu mester a prepara e hendenanpa hiba aeropuerto, a cancela e procedura aki. Presidencia di Venezuela no ta permiti entrada di ningun vuelo, mirando e crisis di coronavirus cu tin na Venezuela.

Di otro banda tabatin hopi rumor cu tabatin caso sumario a tuma luga pa obliga Gobierno pa trece e Arubianonan pega den exterior. 24ora.com a che cu Corte, pero no tin caso registra cu a tuma luga of lo bay tuma luga. Corte no ta funcionando y solamente den un caso di urgencia grandi, un caso por tuma luga. Personal ya caba a cuminsa traha for di cas.