Venezuela lo pidi extradiccion di Roberto Rincon y Abraham Shiera

Roberto Rincon y Abraham Shiera a declara nan mes culpabel den Corte na Merca di a soborna funcionarionan di e compania petrolero estatal di Venezuela. Fiscal hefe di Venezuela, Tarek William Saab, a bisa cu su oficina ta den proceso di solicita extradicion di e dos empresarionan Venezolano, cu ta programa pa ta sentencia na Texas, Merca, pa opera un plan extenso di soborno.

A detene Roberto Rincon y Abraham Shiera na Merca na 2015 y nan a declara nan mes culpabel di a soborna funcionarionan di PDVSA pa sigura contractonan lucrativo.
Na 2016, PDVSA a tuma nota cu e tabata un “victima di fraude” y su brasa di adkisicionnan a solicita pa Corte ordena Rincon y Shiera paga bek e compania pa perdidanan financiero cu ta acumula na “US$600 miyon”.

SAAB a bay mas leu diabierna, bisando cu e empresarionan tabata responsabel di un plan cu nan a malversa 1,16 mil miyon di dollar di e compania petrolero estatal.
“Ambos ciudadano mester ta aki y e oficina di fiscal di estado lo cuminsa cu e tramitenan pa nan ta na ordo di husticia Venezolano, manera cu mester ta,” Saab a bisa.

Su oficina tambe ta buscando activamente otro 12 persona, ya cu e gobierno Venezolano a priminti di tuma medidanan energico contra di corupcion. Presidente Venezolano, Nicolas Maduro, a bisa cu su Gobierno tambe ta persigui e “mafianan financiero.” Durante un conferencia di prensa siman pasa, el a bisa cu autoridadnan a detene 250 funcionario y empleado di e banco cu a desvia miyones di Bolivar Venezolano, e moneda nacional.

Dianan prome cu su anuncio, funcionarionan di Gobierno, a descubri un operacion ilegal di ectraccion di moneda cu ta yama “Manos de Papel,” cu supuestamente ta ataca e economia Venezolano atrabes di e transferencia ilicito di divisa di Venezuela p’afo di e pais, principalmente pa Colombia.

Vice presidente Venezolano, Tarek El Aissami, a anuncia cu a blokia 1133 cuenta, principalmente di e banco Banesco, pa iregularidad den transaccionnan revela pa e investigacion “Manos de Papel”, riba dia 3 di Mei ultimo.