Gobierno di e presidente Venezolano Nicolas Maduro, a suspende dialuna pa 90 dia, e permisonan di e aerolinea TAP Portugal, acusando nan di comete iregularidadnan durante un vuelo cu e lider di oposicion, Juan Guaido a tuma algun dia pasa pa bolbe Caracas.
E avionnan di e aerolinea no lo por baha temporalmente na Venezuela, e vicepresidente Delcy Rodriguez a informa riba Twitter y a laga habri e posibilidadnan di aplica multa y otro medidanan contra di TAP Portugal.
“Tin cu respeta Venezuela,” el a agrega den e mensahe. E Gobierno di Maduro ta acusa e aerolinea di a comete fayonan di siguridad den e vuelo den cual Guaido a biaha, kende ta reconoci den mas di 50 pais como e presidente interino di e nacion Suramericano.
Dia 11 di februari a detene Juan Jose Marquez, un omo di Guaido, kende a compañe riba e vuelo di TAP Portugal, ora cu el a yega e aeropuerto y un tribunal a ordena pa e sigui ta den prizon, acusa di a transporta di forma ilicito arma y explosivo, acusacionnan nenga pa su defensa.
Autoridadnan Venezolano ademas ta bisa cu Guaido no ta figura cu su nomber completo riba e lista di pasahero di e vuelo aki di Lisboa-Caracas.
TAP a bisa den un comunicado cu e no ta compronde e rasonnan di e suspension “ya cu nan ta cumpli cu tur e rekisitonan legal y di siguridad exigi pa autoridadnan di ambos pais.”
“E ta un medida grave cu ta perhudica nos pasaheronan,” e aerolinea a agrega, ora cu nan a bisa cu nan no tabata tin e oportunidad di contradeci e señalamento di e autoridadnan Venezolano.
A base di e acusacionnan publico di funcionarionan Venezolano, un vocero di e gobierno Portugues a bisa siman pasa cu a ordena Inspeccion General di Administracion Interno pa adelanta un investigacion riba un supuesto violacion di siguridad den e vuelo cu a trece Guaido bek pa su pais.
E avionnan di TAP Portugal te aworaki tabata baha na Caracas seis biaha pa luna, apesar di e decision di mayoria di e aerolineanan internacional di no biaha pa Venezuela desde cu e gobierno a stop di paga miles di miyones di dollar na companianan pa pasashinan bendi na bolivar durante un control estricto di cambio.
E Ministerio di Informacion a bisa dialuna den un comunicado cu a entrega un nota di protesta na Francia pasobra su Embahador di Caracas, Romain Nadal, a ricibi Guaido na e aeropuerto internacional siman pasa unda cu e lo a denomina “un strategia cla di provocacion, inherencia y metemento.”
