Venezolanonan ta recorda y celebra 209 aña riba e fecha di awe 5 di juli, e Dia di Independencia di nan pais Venezuela. Un actividad exitoso a tuma luga na HP Bar situa riba e Plaza Padu, den cercania di Fort Zoutman, caminda cu Venezolanonan recidencia riba nos Isla a yega hunto pa disfruta di baile y alegria den compania di otro.
Un dia simbobilco pa e Pais di Venezuela cu ta celebra fecha di nan independencia. Un dia cu ta purba di trece un poco di union entre e Venezonalonan recidencia riba nos Isla cu ta haya e oportunidad di yega hunto y disfruta di e dia no obstante e situacion cu ta pasando aden na Venezuela.
Mirando cu e situacion ta hopi dificil na Venezuela, ta organisa tipo di eventonan manera esun di awe, pa trece e comunidad hunto y asina sinti un poco e calor familiar. Durante e celebracion a tuma nota di grupo di dansa, grupo di gaita, waracha venezonalo como tambe un banda di vallenato pa asina tur presente por difruta di e evento.
Uberto Teran ta manda tambe un mensahe na tur su paisano venezolanonan pa nan ta fuerte, pa nan wanta e situacion y recorda nan cu na e mundo aki no tin malo cu ta dura mil aña, tur tormenta ta pasa. Na e pueblo di Aruba, palabra di gradicimento pa ricibi y duna nan e acogida cu semper nan a haya di e Isla, y e bon trato di semper.
Mientrastanto na Venezuela no tabata tin mucho celebracion. Cu hisamento di e bandera nacional desde e “Panteón Nacional” na Caracas, a cuminsa awe diadomingo e actonan conmemorativo pa e 209 añanan di “Declaración del Acta de la Independencia”, registra dia 5 di juli 1811. Presidente di Venezuela, Nicolas Maduro, a rindi homenage awe diadomingo na e Libertadornan di Patria na ocasion de e 209 añanan di firmamento di e acto di Independencia di Venezuela.
Riba e foto por aprecia Vice-Presidente di Venezuela, admirando awe e acto oficial y original di independencia di Venezuela, despues di 300 aña bou dominio Spaño. Dor di Coronavirus y cuerentena nacional na e pais, no tabatin ningun acto publico awe na Venezuela.
Angelica Velasquez ta conta cu e ta sinti su mes orguyoso di ta Venezolana, ta stima su pais y awe ta celebra e fecha di nan independencia. Nostalgia ta yega su curason, e eventonan aki ta pone tur hende corda riba e calor di ta den famia, di con e venezuela di berdad ta sinti. Sigur ta un sentimento fastios, ta haya falta di su pais y kier regresa lo mas pronto posibel, no ta mucho tempo cu e ta na Aruba y ta carga cu hopi fe cu pronto Venezuela lo recupera y bolbe na locual cu e tabata.
