Venezolano ta keha cu version di discusion y menasa dilanti consulado ta falso

Un dia despues di e eleccionnan presidencial di Venezuela, a sali un publicacion riba e medio aki di un supuesto caso di menasa cu a tuma luga na e consultado di Venezuela.

Segun e prome informenan ta cu lo tabata tin discusion entre personanan tanto di esnan cu ta opone e presidente, como esnan cu ta sostene, anto akinan supuestamente menasa a cay. Di tur dos banda, potret y a haci grabacionnan. Potret di un solo persona para banda di un pickup a circula cu ta e supuesto persona cu lo a menasa. Polis lo a keda di busca su drechi a base di e number di auto cu a aparece riba e foto.
En conexion cu esaki, sr. Jose Rincon, e persona cu ta aparece riba e foto, a manda un carta un carta pa Directie di Buitenlandse Betrekkingen, dunando su banda di medaya di loke a pasa, segun su version.
El a comenta cu como ciudadano, el a yega na e consulado pa asina e eherce su derecho di voto y eynan el a bin topa cu un grupo di 13 persona sinta dilanti di e Consulado General, entre nan participantenan di e PSUV (Partido Socialista Unido de Venezuela) hunto cu funcionarionan di e consulado entre nan, e consul interino, kende ta Luis Cardenas.
Manera cu el a baha for di e pickup, cual ya a menciona na principio di e articulo, e grupo aki a cuminsa grita, unda cu Rincon, a cuminsa saca potret di e suceso.
E ta para riba cu den ningun instante el a menasa hende cu morto, ni tampoco e tabata tin ningun tipo di arma den su poder. Di parti di ambos parti tabata tin grabacion y sacamento di potret.
Den un bay bin di tiramento di palabra, Luis Cardenas a para dilanti di e pick up y a saca potret di dje y di Rincon, unda cu el a bis’e cu e lo haci tur lo posibel pa perhudik’e, cual el a haci tambe door di, segun Rincon, tabata tin e durf di publica versionnan falso riba rednan social, entre nan 24ora.com y otronan.
Rincon a menciona den e carta cu na e momento ey no tabata tin ningun polis presente.
E dia despues di e acontecimento, Rincon a tuma nota riba varios red social cu su potret ta aparece saca pa Cardenas, unda ta acus’e di mensanan di morto y porte di arma, cual, segun Rincon, ta completamente falso.
Dia 22, el a bay na warda di polis, cu su version. Despues di a pasa Recherche, el a wordo manda pa Directie Buitenlandse Betrekkingen concerniente conflictonan internacional, unda cu e ta pidi pa tuma contacto cu e funcionarionan diplomatico di e consulato, pa nan retira por medio di e rednan social tanto na Aruba, como internacionalmente, pa retira e acusacion also aki.
Por ultimo Rincon a menciona cu e funcionarionan di e Consulado, tin e deber y derecho di respeta e derechonan humano di tur e Venezolanonan residencia na Aruba, indiferente cual ta nan preferencia politico ya cu esey ta e finalidad di nan pa “representa” Venezuela internacionalmente na Aruba como tambe esnan cu no ta residente ainta.