Vehiculonan di guera na Corsou ta pa training militar

Ministerio di Defensa di Reino Hulandes ta opone firmemente contra e informacion relaciona cu presencia militar na Corsou debi na e preocupacionnan pa e instabilidad di Venezuela. E comandante di Marina Real den Caribe, Peter Jan de Vin a sinti su mes yama pa refuta e publicacionnan, specialmente locual a core e ultimo siman via rednan social, incluyendo Whatsapp.

Esunnan cu a publica e noticianan falso aki a respalda su afirmacion cu un video cu ta mustra vehiculonan di Marina Real di Hulanda cu recientemente a yega Corsou y cu no ta forma parti di e ekiponan cu ta uza normal riba e isla. “No tin relacion cu e situacion na Venzuela,” de Vin a bisa. E vehiculonan ta di e tipo Boxer tabata en berdad na Corsou, pero no tabatin otro meta cu participa na un entrenamento yama “Explosive Engineers”. Despues di e training, e vehiculonan lo regresa Hulanda, asina e hefe mas halto di Defensa di Caribe Hulandes a enfatisa.

Na aña 2006 caba tabatin un situacion durante e ehercicio “Joint Caribbean Lion” cu Hulanda a participa hunto cu Merca, Francia y Canada cerca di costa di Venezuela. Varios hende a mira esaki como un intento pa intimida e regimen di e ex Presidente Hugo Chavez.

“Explosive Engineers” ta un entrenamento puramente Hulandes. Tabata pa prome biaha cu e ehercicio anual cu e “Genietroepen” a tene na Corsou. Anteriormente e tabata na Noruega, pero e condicionnan den Caribe ta considera mas realista pa e Ministerio di Defensa di Reino Hulandes. E ehercicio di dos siman a coincidi casualmente cu un mocion di Twee Kamer pa yega na acuerdo cu aliadonan riba e fortalecemento di defensa riba e islanan ABC.