Riba caminda grand di Paradera a sosode un accidente caminda tres auto tabata envolvi. nan a bin dal tras di otro cu varios hende cu herida leve.
Diadomingo atardi , un poco prome cu 2:00PM a sosode un accidente den cadena riba caminda di Paradera, net dilanti di Burger King. Un Toyota Yaris (color cora) bayendo direccion ariba (Piedra Plat) a baha su velocidad y duna indicacion di ta bay bira na su man robes, e vehiculo su tras, un Nissan March (color preto) tambe a baha su velocidad pero lamentablemente e siguiente vehiculo cu ta un Mitsubishi Lancer (color shinishi) cu probablemente no a tuma nota cu e vehiculonan su dilante a para y cu consecuencia cu el a bay dal tras di un, mientras e otro a bay dal tras di esun mas dilanti.
Tin di bisa cu e ultimo auto a bay dal basta duro tras di e Nissan March preto caminda un dama cu ta na estado lo a sinti e golpi y sinti malo mes ora na sitio. Pa locual ta e auto mas dilanti, tambe a ricibi algun herida entre otro un corta bou di su wowo cu tabata sangra basta na sitio.
Polis na su yegada a cera e caminda pa evita e fluho di trafico continua, a desvia trafico for di rotonde piedra plat, pa asina sigura cu tur victima keda atendi na momento cu ambulnace presenta. Un rato despues a pidi presencia di un segundo ambulance pa atende e victima cu corta na wowo mientras e otro ta atende cu e dama na estado.
Afortunadamente no tabata persona herida di gravedad, pero pa sigura a opta pa hiba victimanan cu ambulance pa eerste hulp y asina ricibi atencion medico. Daña material tabata considerabel, specialmente e Nissan March cu a sufri mas di tur otro.
