Varios cas na San Nicolas sin coriente pa waya kibra di ELMAR

635

Tanto riba dialuna como diamars varios cas na San Nicolas a keda perhudica na momento cu wayanan di coriente di ELMAR a kibra.

Kico a causa cu e wayanan a kibra no ta conoci. Extra oficialmente a papia di biento fuerte. Esaki a sosode na dos diferente area. E prome dia tabata na Weg Rooi Hundo cu waya di coriente a cay riba un auto. Diamars atrobe waya a cay den e mesun bisindario di Weg Rooi Hundo.

Na momento cu ELMAR ta trahando riba e situacion ariba menciona diamars anochi, ta drenta informacion cu den Parish Hillweg tambe waya a kibra y ta tira riba caminda. A pidi presencia di ELMAR cu urgencia pa motibo cu e hendenan tabata mira cu e ta saca chispa di candela.

Patruya di Polis a yega na e sitio y a cera e caminda na ambos banda pa proteccion di tur hende. A tarda basta pa motibo cu e vehiculo cu e tecniconan mester a finalisa cu e trabou na Weg Rooi Hundo prome.

Tur esaki a dura algun ora entre e dos trabounan pa cual rond di 50 cas a keda afecta.