Varios cacho den mal estado na Solito

Diahuebs atardi banda di 3’or y 45 polis a presenta na Solito 174 pa un caso di mal cuido di cacho. Na yegada di polis no a topa cu ningun hende na cas, ta un compleho parti den dos, pues apartamento. En berdad a nota cu tin hopi cacho den cura y varios di nan ta malnutri. Mirando cu no tabatin ningun hende na cas e defensornan di ley a bandona y mas anochi banda di 9’or y 50 a bolbe bek na e compleho.

Un di e habitantenan di e apartamento a sali y atende cu autoridad, a bisa cu e cachonan no ta dje. A duna polis number di telefon y demas informacion di e doño di e animalnan. Probablemente lo pasa e caso over pa task force of polis di bario.