Uzo di tapaboca a bira obligatorio na Biblioteca Nacional

Biblioteca Nacional Aruba (BNA) a scoge pa e proteccion optimal pa tur bishitante y su empleadonan. BNA a cambia su protocolnan un poco y a dicidi di pidi tur hende bisti un tapaboca (mondkapje) den espacio publico di biblioteca. Esaki banda di e otro medidanan di precaucion manera, por ehempel, uzo di sanitizing gel na entrada. Bistimento di un tapaboca ta obligatorio pa tur bishitante di 12 aña bay ariba. Esaki te un proximo aviso.

Profesionalnan di SVb a pasa controla edificio central di Biblioteca Nacional Aruba y implementacion di tur protocol ta bayendo bon pa percura cu tur hende por mantene distancia di minimo 1 meter y mey. Biblioteca Nacional Aruba ta sinti sigur pa cu esaki pero como cu tin algun caso activo di Coronavirus riba nos isla ta prefera di bay na e proteccion maximo. Ta keda sigui e desaroyonan.

Ta pidi comprension pa e medida aki. Ta pidi bishitante pa bin biblioteca cu nan mondkapje (tapaboca), si a lubida esaki, por cumpra un na entrada.