Den luna di januari te cu awo tin 582 caso activo y 52 persona a fayece, pero na hospital tin 25 persona, di cual 11 persona den cuido intensivo y 14 riba piso general di COVID. E piso di cuido intensivio no a yega su capacidad ainda. E averahe di casonan nobo pa dia ta 60, esey ta mustra cu hende ta cana rond cu esaki pa algun dia.
Gerrick Tromp di epidemiologia, a bisa cu a cuminsa mira reduccion den e casonan di positivo. Edad di fayecemento di COVID-19 ta edad halto, pero a ripara cu edadnan mas jong tambe a cuminsa fayece. Tin un grupo grandi cu ta tarda pa bay haci test, ta trata di 40%. Nan a dura mas of menos dos siman.
Na e momentonan aki tin basta hende grandi interna den hospital. E averahe di 41% ta un grupo grandi di no ta na altura cu nan tabatin contacto cu un persona positivo, of pasobra e grupo cu nunca a bay test y no a sigui e reglanan di cuarentena.
Un total di 50% a contagia na cas y menos cu 40% a bin den contacto door di a bishita na cas.
Altocomisario di Cuerpo Policial, Vanessa Tjon, a bisa cu durante Toque de Queda te cu awo tin 21 detencion, pero a mira cu despues di cierto orario caya ta bira bastante bashi. Tin diferente control tumando luga, no solamente na e parti di gebied verbod, pero ta haci otro contornan. Tambe Crisis team a sinta cu e musiconan y a yega na un acuerdo. Departamento di Cultura ta encarga pa bin cu un proposicion y pa dia 20 di januari e departamento mester bin cu algo. Ta busca un miho solucion pa musiconan.
Ronella Tjin Asjoe-Croes, CEO di Aruba Tourism Authority (ATA), a splica cu aña pasa turismo tabatin un caida di 67%, pero tabatin un 33% di recupercion di turismo. Mercadonan clave pa Aruba, pero tambe mundialmente, tin cifranan halto di COVID-19. Aruba ta exigui biaheronan pa tin un PCR test negativo, pero pa loke ta vacuna, nan lo mira ki momento lo considera esaki como rekisito. CDC na Merca a bin cu un otro medida y esaki ta indica cu tur biahero mester presenta test negativo prome cu regresa e pais. Aruba ta prepara p’esaki y ta brinda e opocion. ATA a cuminsa haya cancelacionnan di turismo.
