UTVnan cu ta pasa den San Fuego tin bisiñanan sumamente preocupa

Bisiñanan di e area di San Fuego a yama un encuentro. E encuentro aki a bira manera algo hopi grandi. Jan Harsveld, un habitante di San Fuego, a splica cu nan preocupacion ta e UTVnan cu ta haci daño na e medio ambiente, esta flora y fauna. Fuera di esey nan ta haci daño na e bario di San Fuego, unda cu tur e habitantenan di e bario, tin keho contra esaki.

 

Con el a cuminsa

Esaki a cuminsa algun siman pasa. Pa sorpresa di e habitantenan, a cera e entrada di Shete, unda cu e touroperatornan cu nan vehiculonan cu turista, sa bay den Parke Arikok, pa asina bay Conchi.

Tin di compronde cu e bisiñanan tabata tin hopi molester di stof y tambe cu e caminda pa yega Conchi, for di Shete no tabata adecuado mas. Nan a desvia e ruta for di Shete pa caminda di San Fuego, pa bay na e entrada di e parke Arikok.

 

Desgracia

Esey a bisa un desgracia di forma cu e no ta soportabel mas. A haci un video di un bisiña cu a conta mas di 375 vehiculo, cu ta pasa un caminda di santo, cu ta duna un molester di stof cerca tur e bisiñanan.

 

Kico kier logra

Harsveld a splica cu e ta kere cu esaki a crece bira grandi, pero e vehiculonan aki rond di mundo, no ta permiti pa core riba caminda publico. Nan ta vehiculonan recreacional, pa core den mondi, etc., pero no riba caminda publico. Den e caso na Aruba si nan ta permiti esaki como vehiculo cu ta wordo cori riba caminda.

E zonido di e vehiculonan aki ta masha halto mes. Awo ki dia ta mira un prikichi ta bula rond, nos parha nacional tampoco nos no ta mira mas. Awor aki nan ta bibando den un parke nacional, cu ni tin un prikichi drechi pa mira. Nan ta prefera di duna e turista un UTV pa core rond, scramble rond. Tur dia ta un breakdown den e vehiculo den parke. Tur dia tin casi un accidente cu e vehiculonan aki y nan ta vehiculo cu ta saliendo for di man.

Antes no tabata tin e tiponan aki. Tabata tin jeep ta core rond manere debe. No solamente den e area aki. Pero rond di Aruba e vehiculonan aki ta un problema.

 

Flexibilidad

E vehiculonan aki a wordo permiti pa nos gobenantenan a permiti pa subi caminda. Aruba su unico pilar economico ta turismo y e ta algo cu tin cu tene masha cautela cun’e pa no dañe. Pero no por ta asina cu turista tin cu daña nos ambiente di biba. E mester ta regla y organisa,

Fuera di e habitantenan di San Fuego, lo bay tin mas accion pa motibo cu e habitantenan no ta haya oido di gobierno. A purba si. A bin wak e caminda, pero diripente nan a bisa cu e caminda ta den Groengebied. Si coy un Groengebied na Hulanda, unico manera pa subi uno, ta cu cabay cu garoshi of cu un bicicleta. Ohala cu tur hende cuminsa core bicicleta. E ora nos ta haya un Aruba hopi sano.

Un Groengebied, segun Harsveld, ta un caminda cu mester por tin un verharding, aunke cu nan bisa cu e no por ta di asfalt, mester por tin un otro solucion pa pone un verharding riba e caminda cu no por trece tanto overlast di stof.

Polis

Polis a bin pa preveni pa tin problema entre e gerencia di parke y e habitantenan. Apesar cu nan no a bin pa demostra. A bin pa trata di soluciona e problema aki y bin na un acuerdo cu parke. Tin cu wak cu parke ta esun cu ta laga y permiti e vehiculonan aki den nan area.

 

Encuentro

Si no haya oido, ta purba di cera e caminda door di bloki’e y yama prensa, si ta necesario.

E molester

Stof ta un di e problemanan, pero no e unico. Tin tambe e overlast di zonido di e vehiculonan aki. Tin cu imagina 375 di e vehiculonan aki tur dia cu ta pasa. Nan muffler tin boroto riba dje. Fuera di e stof, zonido y tambe e gasnan toxico cu e vehiculonan ta laga atras, no ta nada agradabel.

 

Kico e bisiñanan kier

Frank Lansing ta un di e bisiñanan cu ta biba na San Fuego net riba e caminda di santo y e ta haya un tormenta di stof tur dia den su cas.

Despues cu e caminda di Shete a wordo cera sin cu hopi hende tabata sa, tur e vehiculonan di offroad ta bay via San Fuego. Ta mas di 300 vehiculo pa dia cu ta pasa riba e caminda cu ta di tera.

E vehiculonan aki no ta pertenece na Aruba, segun Lansing. Si lesa cuanto accidente ta sosode cu e vehiculonan aki, e ta bisto. Tambe mira cuanto daño nan ta haci na e naturalesa. Tambe, mescos cu Harsveld a menciona, ta saca gasnan toxico.

Otro siman e bisiñanan lo cuminsa cu un protesta y tin pensa di cera caminda y informa e instancianan di gobierno. Nan kier mas hopi publicidad posibel, pa asina e minister por sinta pensa cu kico e ta bezig cun’e.

 

Solucion

Un bo solucion cu por tin ta na prome instancia pa e vehiculonan aki no pasa riba un caminda di santo, sino riba camindanan asfalta. Tambe e velocidad cu e vehiculonan ta core. Pa esnan cu ta huur e apartonan aki, no mag di core nan so, sino semper den un grupo pa asina nan no haya problema den trafico. Y por ultimo den curso di tempo, saca e vehiculonan aki for di e isla.

E negoshi a bira grandi riba e isla cu turista. Pero ningun caminda na mundo e autonan aki no mag di core riba caminda publico, pero na Aruba so. E vehiculonan aki no ta sigur y no ta bon pa e naturalesa.

Si mester asfalta e caminda un bon pida, e problema aki por wordo soluciona. Lansing a splica cu pa tres siman largo a skirbi un articulo den Amigoe. Fuera di esey e ta skirbi un carta ocasional pa esnan encarga, pero e reaccion ta nulo.

E siman aki lo bay forma un comision pa papia cu e minister di Infrastructura, di Finansas y tambe di Salubridad y por ultimo minister di Husticia pa asina gara e toro na su cacho y deshaci di e vehiculonan aki.