Ursell Arends (RAIZ): Politica tradicionalista a percura pa Aruba ta victima di corupcion

Partido RAIZ lider pa Ursell Arends, den combersacion cu 24ora.com a bay riba diferente tema, tanto e situacion reinante na Aruba como e retiro di un di e fundadornan. Resumiendo e ta bisa cu pueblo kier un cambio y no a base di e clase politico cu a enrikese nan mes ultimo añanan.  

Arends a bisa cu loke ta pasando na Aruba ta bini di e politica di corupcion tradicionalista cu e isla a conoce pa hopi aña. El a mustra riba e situacion di entre otro na Serlimar. E Surseance van Betaling ta bay trece hopi informacion, unda cu lo sali afo tur e lista di compania y personanan cu e compania debe y cuanto placa. E ta trece un transparencia obliga, cu lo mustra unda e placa di pueblo a bay.

Partido RAIZ cu vision politico positivo pa nos pais. Click link pa mas https://24ora.news/2MQmtyA

Posted by 24ora on Thursday, June 11, 2020

Apesar di e cambio di Serlimar pa un empresa sui generis pa evita metemento politico, ta mustra cu awendia e situacion no a cambia. P’esey su opinion ta cu sea ta pasa e compania bek pa Gobierno of ta pas’e pa sector priva. Ta clase e politico so a probecha desde Status Aparte y ta tempo pa esaki cambia. Esaki ta encera cu tareanan cu no ta responsabilidad di Gobierno mester bay pa sector priva.

RAIZ ta haciendo uzo di expertonan pa yega na un programa den cual ta keda refleha deseo di pueblo. Por ehempel, pueblo a bisa den pasado caba cu nan no kier mas camber di hotel, y toch ta mira cu ta sigui anuncia cu ta bay construi camber di hotel.

Retiro Tai-Foo Lee

Hopi hende por a nota cu un di e fundadornan di partido RAIZ, Tai Foo Lee no t’ey mas. Segun el a splica, for di aña pasa caba Tai-Foo Lee a expresa su deseo di no sigui den politica mas.

Na inicio di aña a yama un reunion general di miembronan y asina a eligi un directiva nobo, cu ta creando un bon programa nobo.

Na mesun momento a bisa cu sr. Atan Lee no ta papia pa partido RAIZ, pero a lanta su propio movimento FUTURO. “Nunca Atan a papia pa RAIZ, pues nan no tin nada di haber cu otro y Gemeente no ta algo cu nan partido a papia riba dje y ta para pa Status Aparte.” Pero si ta momento pa “upgrade” Status Aparte pa yega na un miho funcionamento y cooperacion den Reino. “Nos kier pa traha a base di respet y harmonia.” Lo bini cu proposicion pa pueblo evalua, principalmente ora di momento di eleccion.

Aruba

Mirando e situacion cu Aruba ta pasando aden, Arends a bisa cu turismo lo keda e pilar economico mas grandi di Aruba. Pero e momento aki ta esun oportuno, pa comercio cuminsa diversifica economia y no keda spera pa Gobierno bini cu iniciativanan. Gobierno mester siomplemente percura pa tin e proceso pa nan ta exitoso. Pilarnan nobo ta pa reforsa esun di turismo. Pero e ta bisa cu a keda demostra cu Aruba semper a logra di Sali di crisisnan cu el  a enfrenta den pasado, manera cu cierre di Lago y awor lo sali atrobe di e crisis crea door di e pandemia. “Ora nos pone cabes hunto y lucha hunto, no tin nada pa para nos.”