Partido UPP ta bay eleccion pa di tres biaha ya cu a lanta e organisacion na 2012. A bay dos eleccion caba di cual e di dos tabata den combinacion cu partido PPA. E biaha aki UPP ta bay eleccion, pero c’un lider nobo, asina Reymond Hernandez a informa.
Ambrioso Wever, conoci como Booshi, tabata na mando den e prome dos eleccion, pero awo a pasa esaki pa otro persona.
Nan a entrevista diferente persona pa por abira lider di partido. Prome cu a presenta e lider di partido, Booshi Wever a hiba un speech. Aki el a bisa cu loke ta bisa hopi biaha ta pa Booshi tuma su retiro y ta un estorbo. Aunke su persona a retira como lider, e lo sigui dedica tempo den politica. A pasa e partido na un persona cu lo sigui cu e principio di UPP. E mensahe di UPP den e ultimo nuebe añanan no a cambia.
E cofundadonan, esta Booshi Wever y Reymond Hernandez, a pasa e liderasgo na e persona cu nan ta kere ta esun cu por lidera e partido. A haci e traspaso simbolico na cas di Wever, unda a scog’e como lider. A pasa e liderasgo di UPP via un antorcha pa Seraida Pemberton-Leonard, kende a bisa di sinti su mes honra p’esaki.
Tambe cu e lo haci su esfuerso pa sigui cu e trabou.E decision di subi arena politico un biaha mas y di tuma e reto como lider di partido, ta un tarea cu no ta facil. Pero despues di hopi deliberacion a dicidi di tuma e reto, unda e kier mira cu tur desaroyo pa San Nicolas no keda atras. E kier aporta na nivel mas halto na tur problema cu el a mira pa mehora.
