“Nos por a tuma nota den prensa cu recientemente tabatin combersacionnan cu Secretario di Estado Raymond Knops, unda cu gobierno di Aruba a cuminsa duna contenido real na entregamento di nos autonomia na Hulanda, a base di e acuerdo traicionero cu Minister Presidente Evelyn Wever-Croes a firma riba e Black Friday 13 di november 2020″, asina un relato di Booshi Wever, lider di partido UPP, ta inicia bisando.
E entreguista a cumpli al pie de la letra cu tur exigencia Hulandes y recientemente a hasta broma cu e gran logro di un “liaison officer” entre gobierno, lesa Prome Ministro Evelyn Wever-Croes y COHO.
Riba su mes e ta un berguensa nacional caba cu entrega di nos autonomia a cuminsa haya forma oficial y definitivo. Partido UPP en todo caso lo a desea di mira e ora nombracion di un persona cu hopi experencia, cu ta refleha integridad, mas neutral cu por carga confiansa di henter nos comunidad y cu nos sa por deal cu e Hulandesnan y ta dispuesto pa defende interes di nos pais cu alma y curpa.
“Cu gran asombro y indignacion nos por atrobe comproba cu de facto e mannan diabolico di Otmar t’ey manera un clabo den e gobernacion actual. Dicon UPP ta bisa esaki? E persona apunta den e funcion di “liaison officer” ta carece di experencia y pio ainda tabata confidente y consehero principal di ex minister Otmar Oduber desde cu e tabata minister pa AVP”, asina Booshi Wever a sigura.
Kico e confidente lo haci ora COHO confront’e cu tur e asuntonan pa cual ex ministro Otmar Oduber ta wordo acusa di dje? E persona cu tabata e “man drechi” di O.O. lo bay permiti sin mas pa investigacionnan contra O.O. tuma lugar sin cu e lo incrimina su mes of sconde documentonan? E persona apunta como “liaison officer” na momento di retiro di ex minister Oduber a bay traha como consehero principal di Prome Minister, mescos cu varios otronan cu a bay traha sea pa Prome Minister of otro ministernan di MEP.
Cu e nombracion aki nos por mira cu e influencia y presencia di Otmar ta grandi y a keda bibo den e gobierno POREDmep y hasta nos ta tribi di bisa cu ta mustra cu e influencia aki ta hopi bisto den partido MEP tambe. E “liaison officer” aki tabata e man drechi principal di Otmar tanto tempo esaki tabata Minister den e gobierno AVPOR y despues tambe como Minister di POR.
Nos tur sa di e acusacionnan serio (7) cu tin contra e ex- Minister aki y e pregunta ta kico tabata e rol di e señora aki den tur e hazañanan y corupcionnan, patronahe politico, abuso di poder, labamento di placa cu e ex minister Otmar Oduber ta wordo acusa di dje? A caso e persona aki no a forma parti di e maniobranan coruptivo di ex-minister aki y lo no a coopera cu minister aki tambe?”, esaki Booshi Wever lo kier sa.
Tabata hopi bisto cu e persona aki tabata actua bou Otmar manera cu e mes tabata Minister. Asina nos por comprende cu por ehempel den e aventura di Serlimar e tabata e persona cu tabata dirigi e ex director di tempo di Otmar. “Lo no straña nos cu e nombracion di e ex-director aki a sosode riba presion di e persona aki. P’esey ta interesante pa sa di e ex-director cu, segun UPP, ta handlanger di O.O. den e.o. e corrupcion di e incinerator chikito, kico e rol di e señora aki tabata den e caso aki y probablemente den e otro casonan cu a hiba Serlimar den e situacion cu e compania estatal aki ta actualmente. Ta riba su instruccion e ex-director di Serlimar tabata actua? Kico su rol ta den e otro departamentonan cu tabata resorta bou di O.O?”, ta preguntanan cu Booshi Wever a haci publico diadomingo mainta.
Pa colmo pa ta sigur cu lo haci e “cover-up” completo, ta wordo bisa cu na januari 2021, Andin Bikker lo asumi e responsabilidad di minister encarga cu Infrastructura y Medio Ambiente. Pues e señora aki den COHO lo por percura pa no tur documento mira luz di dia y Andin Bikker lo completa e obra di “cover up”, segun e comunicado di partido UPP.
Pues Booshi Wever ta constata cu presencia di e persona aki den COHO ta muestra cu de facto ta O.O. ta e “liaison officer” di Aruba. Hopi ta haci nan mes e pregunta con por ta posibel cu O.O di ta e corupto mas grandi cu historia di Aruba a conoce, a para bira esun cu ta dirigi e gobierno POREDmep y ta mustra cu su influencia ta bay mas leu cu hende por pensa. Di unda y dicon tanto poder asina?
E no mester ta un sorpresa mas pa pueblo e papel cu Otmar ta hunga den gobierno ainda. Un gobierno cu den su hamber pa poder no tin ningun tipo di problema pa ta complice den e accionnan coruptivo di Otmar. P’esey si enberdad Aruba kier “get rid” di e tipo di gobernacion asina, mester bin un cambio total na unda no tin luga pa tipo di elementonan asina ey den gobernacion. UPP ta ofrece e REBOOT 2.0 na unda lo percura pa un “MANECE NOBO PA ARUBA” na unda lo elimina mal gobernacion y corupcion.
