UPP kier sa ken ta envolvi den fraude di tereno na DIP

Lider di Partido Union Patriotico Progresista (UPP), esta drs. Booshi Wever awe a lansa preguntanan riba su pagina di Facebook, relaciona cu e supuesto investigacion tumando luga den Departamento di Infrastructura y Planificacion (DIP) pa cu otorgamento di kavel durante carnaval. “Tin un silencio hermetico den e asunto di fraude di kavel!! Ta ken ta envolvi anto?”, asina e lider politico a puntra awe publicamente.

Di acuerdo cu e ex Minister den Gabinete Oduber, cu aparentemente tin 3 culpabel pero ta 2 so a haya sancion! E politico kier sa dicon. Tambe e ta puntrando dicon e Parlamentarionan cu a grita cu nan si lo ta otro no ta bisa algo? E kier sa unda Allan Howell a keda? Booshi Wever ta puntra su mes si e Parlamentarionan a bira sordo, mudo y ciego awor.

Na Directie Infrastructuur en Planning (DIP) tin empleadonan suspendi pa un investigacion riba otorgamento di kavel di carnaval. E investigacion parce di ta indica cu lo a tuma placa di un compania pa regla su kavel pe. No ta conoci si e investigacion a keda interno so of si a pas’e den man di Landsrecherche caba pa e cana su caminda penal. Corupcion den e aparato gubernamental ta un crimen serio cu husticia no por bira cara p’e.

Pero mas leu, e ta haci algun pregunta den direccion di e posibel sospechosonan den e caso. Por ehempel Booshi Wever a puntra cu si ta keda keto pasobra lo tin un candidato di Partido POR envolvi? E kier sa si no ta e mesun persona  tambe cu tabata encarga cu otorgamento di tereno comercial? E ta puntra si eyden tambe e lo a comete fechoria riba instruccion di e ex-Minister?

Aunke cu e politico Booshi Wever no ta menciona nomber, pero e ta puntra cu si un di e sospechosonan lo por ta un candidato di Partido POR cu ta encarga cu otorgamento di terenonan comercial. E unico candidato den dicho funcion ta Ronny Maduro, un comerciante cu antes tabata presentado di noticia na ATV. E tabata e man drechi di Minister Otmar Oduber den DIP.

Di otro banda, pa tin corupcion mester di dos partido, demanda y entrega. Pues esun cu ta pidi y esun cu ta facilita e acto coruptivo. Awor cu a suspende empleadonan publico como esunnan cu a facilita un acto di corupcion, UPP ta puntrando ki momento lo persigui esun cu a pidi pa algo asina. UPP a compronde cu tin un comerciante hopi conoci tambe envolvo. E kier sa dicon awor no ta menciona nomber?

Booshi Wever kier sa si ta berdad e comerciante aki ta esun cu awor ta encarga cu Hospital? “Of el a roga pa no bisa nada? El a bira untouchable awor? E tambe lo get away? Esey kiermeen cu ta pone pushi cuida pisca na Hospital?”, asina e politico cu ta hibando oposicion pafor di Parlamento a puntra awe riba Facebook.

Aunke cu no a menciona su nomber, pero e pregunta di Partido UPP ta dirigi den direccion di e comerciante Ronald “Ronnie” van Trigt, cu nan a nombra recientemente den Raad van Bestuur di Hospital. Aunke e ta temporal, e nombracion ta contra tur regla di bon gobernacion, pasobra Total Cleaning ta encarga cu limpiesa na Hospital, pues e ta un “vendor” y riba dje Van Trigt ta den Raad van Toezicht di AZV, cu tin un relacion estrecho cu Hospital.

UPP ta spera cu Minister Marisol Lopez-Tromp lo sali y duna un aclaracion. “Aki tambe mester haci un investigacion financiero y forensico den otorgamente di tereno comercial desde aña 2009 y na placa chikito!”, di acuerdo cu Booshi Wever di Partido UPP.

Noticia relacionaMas for di e autor