Dialuna merdia un grupo di mas di 30 turista Argentino a tuma contacto cu 24ora.com pa asina splica cu COPA Airlines no a laga subi e ultimo buelo for di Aruba. Esaki a hasi cu nan ta pega awor na nos isla.
Despues di a presenta dilanti Parlamento, 24ora.com a recomenda nan cu ta mihor pa nan bay na Bestuurskantoor. Esaki mirando cu Gobierno di Aruba lo por tin mas exito den brinda asistencia. E grupo a hasi esaki tambe y a logra combersa cu Minister Xiomara Maduro. Minister a mustra comprension pa cu nan problema y segun nos por a compronde a pone nan den contacto cu ATA pa asina por yega na un solucion.
Pa loke ta COPA Airlines nos a ricibi e informacion cu ta Argentina a dicidi pa limita e buelonan cu ta yega e pais. Esaki a hasi cu nan no por a permiti e turistanan aki subi e buelo cu lo a bula pa Panama. E turistanan lo a keda pega na Panama mirando cu no tabata tin autorisacion pa bula pa Argentina mirando cu Argentina ta hasiendo algun excepcion so pa buelonan special.
