Un cargamento basta grandi di droga confisca riba e tugboat Gracia cu autoridadnan a intercepta dialuna den oranan di madruga na cabes di Aruba.
Desde 5’or cu e tugboat a yega waf di Aruba, a cuminsa un buskeda den e tugboat Gracia unda cu a bin haya cantidad di bulto di droga (aparentemente cocaina).
E tugboat aki a sali for di Cartagena rumbo pa Aruba, pero niun momento a informa autoridadnan local. A drenta un tip y den oranan di madruga, rond di 2’or, a señala nan na 2 miya pariba di Aruba cu cinco persona (Colombiano) abordo.
E cinco personanan aki, despues di a descubri e droga, a detene nan mesora. E unico cu a keda na e sitio pa duna splicacion ta capitan di e Tugboat y transporta esaki pa Savaneta.
Na e sitio tabata presente Alto Comisario Andrew Hoo y Comisario Vanessa Tjon hunto cu demas autoridadnan di sector hudicial y policial.
Pa motibonan di siguridad pa e tantisimo droga haya abordo, lo transporta tugboat GRACIA pa e steunpunt di Guardacosta na Savaneta.
Na e sitio ey ta bay baha y pisa e cantidad di droga. Despues ta entrega e material aki na Cuerpo Policial di Aruba.
