UPA: ASTEC kier scapa placa di empleado pa un grupo djodjo

1975

Di basta tempo sindicato di UPA ta cuestionado e maneho di e director di Astec, di cual awo e empleadonan no ta bay acepta ni tolera nada mas. E miembronan di UPA a ricibi un carta for di e director cu ta basta menazante y nan no ta acepta esaki, unda cu ta bisa retironan lo cay.

Algun siman atras, e director a yama 5 empleado y a informa nan cu nan lo bira empleado di siguridad.

Dave Franken di UPA a bisa cu e empleadonan aki ta esnan cu a drenta mas ultimo den e compania y a pone nan lomba contra muraya. UPA a purba di coach nan, pero na final nan a acepta e deal di director. E sindicato a reuni cu e director y a bis’e cu ta kita 5 hende di operacion poniendo cu lo keda 5 hende menos. Segun e director, nan tin tur cos bou control y lo maneha e dos shiftnan cu tin.

Desde dialuna caba no por cera ni un shift completo y awo ta bisa empleadonan cu no lo paga overtime. Ta trahando cu menos personal y esaki UPA nan no ta acepta. UPA a bisa e director pa cambia e maneho aki, mientrastanto e sindicato lo reuni cu miembronan pa mira kico ta e siguiente paso. Loke e director ta haciendo ta dictadura, segun Franken. Na Aruba no conoce dictadura y nan no lo acepta esaki tampoco.

Astec tin 5 aña sin un CAO y awo tin un director cu ta yega impone regla. E director kier pa nan traha cu menos empleado y esey ta un problema pa nan, segun Jamir Dijkhoff. Awo tin menos personal y nan mester traha asina. E director no ta importa si e bida di empleadonan ta na peliger of no, simplemente pa spaar placa. E ta pinta e empleadonan malo cerca e shareholdernan, na agencianan y haci manera cu nan no kier traha.

E empleadonan no ta di acuerdo cu esaki, pasobra nan kier traha y p’esey ta pidiendo pa duna nan hende pa haci esaki. Den e carta e director a pone “no work, no pay” y si sigui haci asina, lo kita e persona for di trabou. E empleadonan no ta acepta esaki pasobra nan kier mas hende y material pa traha. UPA ta representando casi 40 empleado, ta parti den 2 grupo y semper tin problema riba waf, pero awo nan tur a cera cabes hunto. Segun Dijkhoff, nan kier scapa placa pa un grupo djodjo, p’esey e empleadonan a bisa esaki ta basta. Astec falta empleado y esey ta loke nan ta boga p’e. A saca empleado for di nan y awo ta bisa nan cu si ta 5 hende tin, cu esey nan mester draai waf.

Trabou ta draai constant, unda cu barco ta drenta constant. E cantidad di carga a baha, pero e trabou ta keda mescos. El a sigui bisa cu si tabata baha 100 container pa dia y awo 70, e truck ta draai, mester di uploader pero e trabou ta keda mescos. Tin un maneho awo cu nan tin di percura pa draai cu e cantidad di hende cu tin y zorg pa placa drenta. E trabou riba waf no ta safe. DTI yega eynan por mira con e mashinnan y den ki peliger nan ta traha.

Loader Loading…
EAD Logo Taking too long?

Reload Reload document
| Open Open in new tab

Download [1.91 MB]