Universidad di Aruba lo tin Open House pa tur interesado

Universidad di Aruba lo tin dia 6 di april nan Open House cuminsando desde 9:30am. Aki nan lo bay ta dunando informacion na tur esunnan interesa den Universidad di Aruba. Nan tin diferente estudio pa brinda, unda cu tin 4 facultad. Tambe tin diferente programa cu ta cay bou cada facultad.

Tin e facultad di ley cu ta esun di mas conoci pa diferente hende. Tin facultad di accountancy, finance & marketing, facultad di arte y ciencia cual bou dje tin 2 programa cu ta social work development y organization and governance management. E ultimo facultad ta di hospitalidad y turismo.

E bishita cu Universidad di Aruba ta uno hopi varia, pasobra nan ta ricibi di edadnan mas jong te na esunnan mas experencia cu tin diferente interes. Tin personanan cu semper tabatin e gana di studia, pero pa un motibo of otro no por a haci esaki. Awo na un edad mas grandi ta buscando un manera pa bin haci nan soño bira realidad. Nan ta bin busca informacion kico ta e posibilidad pa nan, asina Natalie Solognier di Office of Student Affairs Universidad di Aruba a bisa. Tambe tin studiantenan cu ta jong y ta terminando sea HAVO of EPI ta buscando unda nan ta bay, si ta keda Aruba of ta bay exterior.

Entrada lo ta uno gratis y porta lo habri desde 9:30am te cu 1:30pm, unda cu por haya informacion na e diferente booth di programa. Banda di e facultadnan, Universidad di Aruba tin 2 programa cu ta ofrece. Segun Natalie Solognier, esaki ta e acadamic foundation year cual ta prepara bo 1 aña p’e bida universitario, sea ta keda na Aruba mes of ta bay afo. E ta un programa basta bon bishita y tin hopi interes p’e. Tin e programa nobo cu ta bay cuminsa y esaki ta e sistem, cu lo enfoca riba sostenibilidad y energianan nobo. Tambe lo bay tin bar y cushina, pero tambe un sesion apart pa mayornan. Universidad a mira cu mas mayor ta interesa den estudio di nan yiunan, kiermen nan tin pregunta, nan tin duda. E biaha aki a bin cu e sesion special pa asina mayornan sa kico pa spera di nan yiunan ora cu nan ta Universidad di Aruba. Entre e dia lo bay tin sesionnan general y diferente programa.