Universidad di Aruba a tene su opendag diasabra ultimo, pa asina esnan interesa haya un miho comprondemento kico e ta ofrece y kico bo por spera como studiante.
Danian Labasti ta studiante di Organization, Government and Management OGM, y el a comenta cu hopi biaha hende ta pensa cu nan no kier studia na Aruba y no ta bin Opendag. Aruba no tin nada pa nan, pero e cos ta, cu Aruba tin basta cos. Tin por ehempel FEF cu ta consisti di economia y mercadeo, tin OGM, Social Work, SiSSTEM, cu ta un programa nobo.
Ora cu bay Universidad por haya un miho comprondemento con e ta traha en general. Hasta aki na Aruba, na Merca, Hulanda. Universidad ta keda un universidad. Y den un Opendag bo por haya sa kico pa spera den un Universidad.
Labasti como un studiante, a splica cu Aruba ta un isla chikito y si mira den sistema di maneho, hopi biaha ora cu tin cu tuma decisionnan grandi ta haya hende di afo – di Merca of Hulanda, cual ta hopi bon, pasobra nan tin un sistema cu nan ta uza y nan tin un otro manera di pensa cu ta yuda nos haya un solucion mas lihe.
Facultad di hospitalidad y turismo
Laura Molina ta un studiante den su di tres aña, haciend’e un senior. E tambe tabata t’ey presente durante e Opendag y for di mainta tempran diasabra nan tabata bezig.
E ta conta cu nan no a spera cu lo a haya un turnout asina grandi. El a bay sumamente bon. Nan tabata tin nan prome slide, unda cu tur hende cu tabata interesa den e diferente facultadnan por a bay y haya un presentacion un tiki mas personalisa riba e estudio cu nan ta interesa aden.
Tambe nan tabata tin diferente booth setup pafo, unda cu tur hende por a haya foyeto di experiencia di e studiantenan di e facultadnan tambe y di e docentenan.
Pa loke ta e facultad di Molina, e ta conta cu su estudio ta tres aña largo y ta bezig ta haciendo hopi investigacion. E facultad ta hopi dinamico. Bo ta siña hopi y ta haya diferente habilidad. Habilidad di liderazgo, di desaroyo personal y mas curso cu ta siñabo cosnan mas specifico. Entre otro International Management, Human Resources, Restaurant Management, pues un tiki di tur cos.
Esey ta forma cu bo ta crea un profesion di tur banda, caminda cu nan ta hopi diverso. Esey ta bezig cun’e awor aki.
Otro cursonan
Molina a splica cu tin mas facultad, entre otro di ley, FEF, Sisstem, cu ta esunnan di mas nobo na Universidad. Tin e Academic Foundation Year. Esaki ta uno popular, pasobra ora cu nan caba nan HAVO, VWO of EPI, tin di nan cu kisas kier tuma e gap year of nan no sa kico nan kier haci ainda. Esnan di e Academic Foundation Year ta sinta cu nan y esey ta duna nan mas un direccion kico nan kier bira den futuro. Si nan kier keda na Universidad mes bay pa Bachelor of Masters of bay afo.
Docentenan
Nicole Hart ta docente di e programa Social Work & Development di Universidad di Aruba y e ta conta cu nan ta hopi contento cu e resultado di e Opendag. Nan a haya hopi hende cu a bin bishita nan, mirando cu tabata un dia hopi druk. Tabata tin hopi interes pa social work e aña aki, cual pa nan tabata hopi importante, pa crea mas trahado social na Aruba.
Trabao social
Di tur e graduadonan, tur di nan den comunidad di Aruba tin un trabao den werkveld. Esey ta nifica cu e necesidad di e complexidad cu tin den trabao social ta creciendo y tin mas profesional pa haci esaki. E ta un area cu ta hayando mas atencion compara cu e añanan anterior.
Opleiding
Meta di e opleiding ta full na Ingles. Tambe tin cierto vaknan cu ta na otro idioma manera Papiamento y Hulandes. Pero un studiante tin e habilidad den cuater aña haya su bachelor degree di social work na Aruba y tin e habilidad di bay afo cu e Erasmus Exchange Program pa haci su stage afo of bay un semester afo pa studia na un otro pais. En todo caso e ta haya un rango hopi amplio den estudio, kedando na Aruba, segun e docente.
