Unidad Mobil a cuminsa vacuna clientenan di Casnan di Cuido

Awe mainta a sali direccion pa casnan di cuido e unidad mobil di DVG. E unidad ta ekipa cu dokter, enfermera, personal administrativo y chauffeur pa di e forma aki pasa na cada cas di cuido pa vacuna e  grandinan y tambe e personal di e diferente casnan di cuido rond Aruba.

E personal di e unidad mobil ta completamente ekipa pa prepara e vacuna na sitio y tambe ta ekipa pa asisti medicamente den caso cu presenta cualkier situacion unda extra asistencia medico ta necesario. Tur casnan di cuido a wordo avisa adelanta pa nan por prepara pa ricibi e unidad mobil na nan fecha stipula.

E prome cas cu a ricibi nan vacuna contra covid-19 awe tabata cas di cuido Oasis na Monserat. Sr. Alejandro Sanchez, gerente di e cas di cuido tabata prome pa ricibi e vacuna na sitio. Ta di admira y remarca cu mayoria di e personal y habitantenan di Oasis a bay di acuerdo pa ricibi e vacuna.

E unidad mobil a wordo bon ricibi na cas di cuido menciona. Den transcurso di e siman aki lo yega na tur casnan di cuido. 

E unidad mobil  tambe lo vacuna pashentnan cu ta bedliggend na cas y no por bay un prikpost pa ricibi vacuna. Esun cu tin un familiar cu ta bedliggend na cas y ta desea cu e persona ta haya e vacuna, tuma contacto cu su dokter di cas y dokter di cas lo regla pa e unidad mobil yega na cas cerca e pashent.