Un weekend di tattoo y halloween na Mina di Fosfaat

Hazaña Mega Museo Heintje Ras ta bay tin dos actividad di recauda fondo. Esaki ta pa sigui cu su meta di por cumpra un tereno, unda e por traha un museo grandi pa pone historia di Aruba como artefacto den dje.

Charlene Marchena, representante di Hazaña Mega Museo Heintje Ras, a informa cu e dos actividadnan aki ta pa sigui recauda fondo hunto cu Aruba Explorers y House of Fame. Heintje Ras ta den e Mina di Fosfaat pa 23 dia y e meta ta pa keda eybou 100 dia. E dos actividadnan aki ta sea haci tattoo of Haunted Mine organisa pa Aruba Explorers. Esaki lo cuminsa dia 29 te cu 31 di october venidero.

Chayene Werleman, representante di House of Fame, a informa cu nan lo tene e evento di recauda fondo p’e proyecto di Hazaña di 100 dia den Mina di Fosfaat. Diabierna, 29 di october, e lo ta n’e mina entre 10:00 am te cu 6:00 pm sinta den un trailer pa haci tattoo. E placa recauda lo bay pa e hazaña.

Pa recauda fondo: Evento di Halloween den mina di fosfaat hunto cu Heintje Ras

Posted by 24ora on Monday, October 25, 2021

Stacey Sevinger, representante di Aruba Explorers, a splica cu nan ta organisa e fin di siman aki un Haunted Mine, cual ta nan contribucion p’e meta di Heintje Ras. E actividad aki ta diasabra y diadomingo di 6:00 pm pa 9:00 pm. Durante e actividad aki no ta permiti mucha bou 12 aña pa baha den mina. Tambe tin un contribucion n’e recaudacion ta di 15 florin pa persona y esaki cu lo bay n’e hazaña di Heintje Ras. Ta pidi un y tur pa bini c’un keds, telefon y flashlight. 

Pa cobertura mas amplio, lesa e edicion di TREMPAN mañan.