Desde ora di mainta parlamento a cuminsa cu e reunion di iniciativa di ley di screening di minister cu ta bira candidato pa drenta den un gabinete. Na final e ley di screening a pasa cu diesnuebe na fabor y un contra.
Presidente di Parlamento, Edgard Vrolijk, tabata tras dje iniciativa di e ley aki. El a splica cu na final di dia e resultado tabata faborabel. Sigur e tabata uno positivo pa parlamento na momento cu e votacion a sali diesnuebe na fabor y uno contra, tambe tabata falta un miembro. Esey ta indicacion cu parlamento tabata tin casi mayoria pa aproba un ley di screening pa cual ta minister.
Segun Vrolijk, esaki no tabata facil ya cu el a traha tres aña riba dje. E no a rindi y na 2020 no a aproba esaki, pero e no a lag’e un banda. A sigui persevera y awe e ley a bira un realidad. E ley aki no ta pa su persona, pero pa comunidad. No por laga ley so defini, pasobra e rol di parlamento ta uno hopi importante. Aworaki e ley ta pone un cuadro con un minister tin di comporta su mes, kico e tin di haci, atende cu ne y asina tin mas transparencia. Esey no ta kita afo ainda e autoridad cu parlamento tin pa kita un minister ta ancra den constitucion. Awo parlamento tin mas tools pa controla.
Durante e tratamento dje ley y votamento, parlamentario Arthur Dowers di AVP no tabata presente. Segun Vrolijk, e ta un persona cu t’ey tur ora p’e reunionnan aki, pero algo por a pasa cu e no tabata presente e biaha aki. Nan tabata sa cu lider di fraccion ACCION21, Miguel Mansur, ta bay vota contra dje ley. El a expresa cu esaki ta keda na su prerogativo, su pensamento y a bisa di vota contra. Segun presidente di parlamento, el a curasha Mansur pa cana su caminda si e ta haya cu e ley no ta sirbi, traha e ley, haci iniciativa di ley nobo y entrega esaki.
Pa cobertura mas amplio, lesa e edicion di TREMPAN mañan.
