Un turista y un residente a yega Aruba contagia cu Covid-19 for di Miami

Departamento di Salud Publico Aruba (DVG) a informa cu a constata dos caso mas di Covid-19 (Coronavirus) na Aruba. Ta trata aki di un residente femenino di Aruba y un turista, nan tur dos a haci un test na Aeropuerto mes. Un di nan a bin di Rep. Dominicana via Miami y e otro a bin for di Miami mes.

Ambos persona ta bon di salud y segun proceduranan di protocol, nan tur dos a bay den isolacion. Te cu ayera tabatin 4 caso activo riba nos isla, cu ta un di e ruman muhenan cu a bin di Colombia contagia, e persona di Peru, e Piloto y un residente mas di Miami. Ta obvio cu ainda ta residentenan so a yega nos isla contagia cu e virus. Sinembargo, un di e pashentnan a cura completamente awe, despues di test 2 biaha consecutivo como negativo.

Pero no a haya chens mes pa anuncia cu nos tin un caso menos, debi cu mesora awe a raporta di dos caso activo mas cu a presenta. Cu e dos casonan di awe, awor e total a bira 5 caso activo di Covid-19 na Aruba. Por nota pues cu e sistema di filters, screening di controlnan ta dunando resultado. Ta garando a virus prome cu e por drenta nos comunidad y sigui plama.

DVG ta desea e pashentnan pronto recuperacion. Pa mas informacion tocante di update di casonan di Covid 19 y tur otro informacion, Tips y Protocol por bishita e website www.arubacovid19.org.