Un total di 25 chauffeur a haya multa despues di Caiso & Soca Monarch

Diasabra prome, durante y despues di Aruba Caiso & Soca Monarch 2019 a tuma luga un control di trafico riba camindanan principal. E Unidad Motorisa di Polis a controla pa velocidad halto, motocycle sin documento y/of sin rijbewijs, alcohol y luz. Na tur a controla mas o menos 100 auto di cual 25 a haña boet pa velocidad halto y 3 chauffeur a haya boet pa falta di luz dilanti.

A confisca un sportbike cu tabata haci hopi desordo 4:00am den Sabana Basora. For di e rotonde Pos Chikito caba Polis mes por a scucha con e motociclista tabata molestia henter e bario di Pos Chikito y Sabana Basora.

Uzando tactica Polisnan a bay na e sitio y den e bario memey di e complex di casnan na Sabana Basora Noord, a logra blok e caminda completo pa e brommer no sigui core y asina e logra confisca e motorcycle pa falta di documento. E chauffeur hoben tampoco tabatin un rijbewijs valido pa mustra e defensornan di ley. Cu esaki Polisnan a ricibi un compliment di e bisiñanan cu tabata fada di basta tempo di e situacion aki.

Cuerpo Policial ta corda automobilistanan cu e tipo di controlnan asina lo continua den forma sporadico durante henter e temporada aki di carnaval. Ta pidi tur cu ta participa den trafico pa percura cu tur documento ta na ordo y pa no stuur si a consumi alcohol. Consecuencia lo ta detencion, multa y posibel perdida di Bo rijbewijs.