Minister di Transporte, Chris Romero, durante su biahe di trabou na Brasil a bishita e fabrica di MAN/Volkswagen, cu ta e compania cu a fabrica e flota nobo di bus pa ARUBUS NV. A compaña e mandatario, Ing. Edison Briesen, consehero, Director di ARUBUS NV, Edwin Mohamed y representante di Jossy Motors, esta Cesar Tromp, cu ta e compania representante di MAN/Volkswagen na Aruba.
E delegacion di Aruba a wordo ricibi na e instalacionnan di Resende, Rio de Janeiro, pa Leonardo Juan Soloaga, Director di MAN/Volkswagen na Brasil. El a duna un splicacion amplio di e fabricacion y demas rekisito di e 15 busnan nobo cu ta na caminda pa Aruba.
Durante e reunion cu Soloaga a papia di e trabou den conhunto cu lo tin entre ARUBUS NV y MAN den futuro pa loke ta, entre otro, entrega di piesa, intercambio di mecaniconan, con pa progama service di e busnan nobo y particularmente den e periodo di garantia. Esaki ta ser haci pa MAN y su representante na Aruba.
Mester remarca cu e bishita aki tabata masha productivo, como cu a cera aliansanan solido entre e compania Brasilero y Aruba, cu lo traduci miho productividad den transporte publico riba nos isla y specialmente pa nos compania estatal ARUBUS NV.
