Un situacion alarmante: Ladronicia di kabel di koper di Elmar varios caminda

Tin un situacion hopi serio y alarmante cu pueblo mester sa. Y abo como pueblo lo bira e wowo pa asina pone un fin riba e problema aki.

Kico e ta?

Ultimo simannan tin un hende of ladronnan cu ta subiendo palonan di luz. Palonan di luz di Elmar y nan ta cortando e kabelnan di Elmar cu coriente riba dje. Esey ta nifica cu na momento cu nan cort’e, hopi cas ta perde coriente.
Diaranson por ehempel na Juwanamorto, Bottom Hillweg y tambe otro areanan di San Nicolas tambe nan a corta e kabelnan di Elmar.
Nan ta hortando e kabelnan aki pasobra ta kabelnan di koper. Algo peligroso. Esun cu ta cortando e mester por sa.

 

Un situacion alarmante: Ladronicia di kabel di koper di Elmar varios caminda

Un situacion alarmante: Ladronicia di kabel di koper di Elmar varios caminda. Click link pa mas https://24ora.tv/2WSXPAM

Posted by 24ora on Thursday, May 16, 2019

E situacion ta serio. Por ehempel den Klavelstraat a horta djis door di subi corta kabel di coriente cu coriente riba dje. Tin un scol eynan, esta Pieterboerschool. Si wak bon, tin yen di mucha den e cura di scol cu mainta ta pasa riba e caminda aki y ta mira kico ta keda colga na momento cu a horta e kabel den oranan di marduga den Klavelstraat.
Ta un kabel cu a resta ta colga cu ken cu yega mishi cun’e, ta nifica su morto. Pero ya caba, na momento cu a wordo notifica un biaha mas, personal di Elmar cu ta bezig dilanti di sede di PPA na San Nicolas, nan a bin mesora y a kita e coriente for di henter e sistema cu ta feed e area aki. Pa nan por cuminsa traha riba dje, pero pa garantisa e siguridad.

Imagina cu un di e muchanan a yega na e sitio y a mishi cu e kabel aki, ta nifica cu awe nos lo tin un morto garantisa. Si bo mishi cu e kabel aki cu coriente riba dje, bo no lo scapa.
Por a mira personal di Elmar trahando caba. A bin cu dos team na San Nicolas. Nos a ricibi informacion cu diaranson tabata na Yuwana Morto, Bottom Hillweg y tambe otro areanan di San Nicolas. Esey tabata diaranson. Awe el a cay pa Trinitariastraat, a scucha bisiñanan ta keha cu nan no tin coriente.Tambe Klavelstraat. Ya caba personal di Elmar ta tirando e kabelnan pa asina percura cu mas despues e coriente ta on bek den e bario di San Nicolas, caminda cu un biaha mas a wordo horta.

A haya informacion tambe cu tin mas caminda cu tambe a perde coriente durante oranan di marduga, pa motibo cu a horta kabel. Nos a ricibi yamada di varios bisiña cu nan diripiente ta perde coriente den oranan di marduga y a resulta cu nan bario a perde coriente pasobra cu tin hortamento di kabel.Personal di Elmar, cu tin hopi trabao pa haci, mester desvia totalmente for di nan trabao pa bin drecha loke a wordo horta na kabel. A tuma nota tambe cu e hefenan di Elmar tambe ta bezig. Tin di compronde hasta nan ta bezig ta haciendo un denuncia. Un hende mester ta cumprando e kabelnan aki. Si ta bon tin un ley cu na Aruba bo no mag di haci negoshi di koper. Solamente di transito koper por pasa y sigui wordo exporta. Pero a tuma nota cu aunke tin un ley a wordo cambia, toch tin ladronicia di koper tur dia. Awo a bay asina leu cu nan a cuminsa horta kabelnan di Elmar cu coriente riba dje y despues ta bende e kabelnan aki.

Ta facil pa haya e kabelnan aki un caminda cu ta cumpra koper. Y e personal di Elmar actualmente ta bezig. Tin tambe e otro areanan cu diaranson tambe esaki a wordo horta.
Ta spera cu autoridad pone man riba e ladron of ladronnan aki. Ta algun hende ta cumpra koper na Aruba y ora bende metal, bo mester duna cuenta ken ta esun cu a bin bende bo. E ora si ta pone un fin na e cos aki y pone man riba e ladronnan di koper.

Anthony Tjin Kon Fat ta encarga cu e palonan di luz y e ta conta cu e antisocialnan aki ta yega anochi, mas tanto marduga, ta subi e palonan di luz, corta waya di coriente y ta coy esakinan pa bende pa koper. Tin di e wayanan ta keda cu coriente riba dje, bisiñanan ta perde coriente na cas. Pero nan tin cierto modo cu nan ta hacie net cu e cliente no ta perde coriente, pero toch bay cu e waya.

Peliger ta grandi

Segun Tjin Kon Fat, e waya cu a corta na Klavelstraat, no a keda cu coriente riba dje, door cu e ta sali for di unda e ta voed. Pero diaranson a haya uno cu a cort’e y a cay. Door di e tironan di e waya of e spartmento di candela, nan a lo a core bay lag’e. Elmar a yega eynan y nan a hay’e cu coriente riba dje, cual a preocupa nan hopi.
Varios caminda el a pasa caba pero esaki tabata algo abao. E otronan nan tabata cort’e net na un manera cu un mucha por yeg’e.

Un bista

Pa Elmar e balor di placa e ta hopi. Pa e hende cu ta hort’e por ta e no ta hopi. Pero pa Elmar e ta mas caro na placa y e cliente tambe ta perde su coriente. Hera nan ta kima cos di hende pasobra nan ta corta e waya cu net e cas ta bay bao di 220.
E pida mas principal ta e bida di hende inocente. Esta esnan cu no sa nada y por bin bao di coriente.

Denuncia

Den pasado caba Elmar a yega di haci denuncia. Awor aki el a lanta un cabes. Director di Elmar a duna Tjin Kon Fat machteging pa e bay haci denuncia na warda di polis pa asina cuminsa tira mas bista riba e kabelnan. Tambe ta pidi pueblo di Aruba pa asina nan mira algo, yama, duna tip na polis, wak kico nan ta uzando, si ta cu truck of cu trapi, con nan ta haciendo y kico por haci pa yega na e malhechornan aki.

Con por interpreta e hecho aki

Tjin Kon Fat a splica cu e persona of personanan en cuestion mester por conoce of ta bao di guia di un hende cu conoce e sistema, cunan ta corta net cu hende no ta perde coriente, nan por traha trankil. Si perde coriente na cas, di biaha ta sali wak kico ta pasando. Y Elmar no ta traha marduga. Pero ta cosnan cu ta pasando.

Kabelnan di koper

E kabelnan aki no tin isolatie, nan ta cla pa bende. No sa di e luganan cu ta cumpra, si nan sa cu nan ta cumprando algo cu ta bin di ladronicia. Por ta nan por wak esey tambe. E por yuda Elmar hopi. Tin liñanan pa expande pa e casnan nobo cu ta keda cla cu tin cu haya coriente pronto. Tin cu stop eseynan pa duna e clientenan cu a perde coriente. E ta practicamente tur dia. Tin como dos siman cu ta tur dia tin hende ta saliendo pa traha riba esakinan.

Si bo wak algo yama

Departamento di Storingsdienst ta 5237147 ta disponibel te cu 12’or di anochi. Despues tin e tape cu ta duna e number di e opzichter cu ta na warda. E opzichter lo contesta y lo tira un bista pa wak kico ta pasando.

Comments

comments