Awe dia ta habri normal atrobe, trabounan ta continua mesun cos y Gobierno ta topa den Conseho di Minister. Tur siman riba diamars y diabierna tin reunion di Conseho di Minister, den cual e 8 Ministernan di MEP-POR-RED ta reuni. Diamars ultimo no tabatin debi na entiero di Miro Dabian. Awe lo bira e prome encuentro atrobe entre Andin Bikker y Marisol Lopez durante Ministerraad, den cual Evelyn Wever-Croes lo tin un rol awe di Minister Presidente y di Referee entre e impasse existente den seno di POR.
Ta parce cu ainda no tabatin un reunion pa habri dialogo entre POR, cu awendia ta encabesa pa mr. Andin Bikker y drs. Marisol Lopez-Tromp, candidato number 3 riba e ultimo lista di POR y awendia Minister di Infrastructura y Medio Ambiente pa Gabinete Wever-Croes. Despues cu e partido politico POR a nota e comentarionan negativo den comunidad, specialmente contra e forma con POR kier a core cu Marisol Lopez for di partido y for di Gobierno, a dicidi pa cana e caminda di dialogo. Un reunion di dialogo sinembargo no a tuma luga ainda.
Pa esunnan cu ta sigui politica di cerca, no ta dificil pa realisa cu esun tras di henter e asunto aki no ta ningun otro hende cu ex-Minister Otmar Oduber. E no ta contento cu e hecho cu e Minister nobo di Infrastructura no ta sigui instruccionnan of ta tene suficiente cuenta cu metanan di e partido. E unico cos cu e no a realisa ta cu aki ta trata di un politico cu hopi experiencia, pues cu lo no ta facil pa manipula. Siendo Minister na dos ocacion caba tambe, Marisol Lopez hamas lo a tuma e encargo si e tabata sa cu prome cu tuma cualkier decision, cu e lo mester consulta cu Otmar Oduber y Andin Bikker pa aprobacion.
Ta resulta awor cu e decision pa core cu Marisol Lopez for di partido y for di Gobierno tin consecuencianan devastador pa e partido politico. Na prome luga, no a logra haya un reemplasante. Joselin Croes lo a nenga di kita for di trabou na Washington, na unda su yiunan ta bayendo scol caba, pa bin ocupa e puesto aki na Aruba. Si saca Alan Howell for di Parlamento pa e bira Minister, ta e mesun situacion lo sosode, esta cu Marisol Lopez lo por drenta Parlamento bek. Den e scenario ey, lo mester opta pa trece un persona mas abou riba lista of te hasta nombra un “vak Minister” pa partido POR.
Pa awor, den cierto forma, Marisol Lopez-Tromp a introduci un “novum” den politica na Aruba. Di un Parlamentario independiente cu nos conoce den Parlamento, awor tin Minister independiente tambe, pasobra e no ta pertenece mas na ningun partido. Cu e carta di retiro cu el a ricibi y cu ainda ta vigente, e chens pa regresa den e partido ta cada bes mas chikito. Di otro banda, e dos Parlamentarionan di POR den Parlamento lo mester sigui defende su maneho, aunke e no ta representa e partido mas.
E lo bira dificil si ora di bay Parlamento pa pasa un ley por ehempel, pasobra Bo nunca sa cuanto sosten Bo lo tin. Normalmente, siendo parti di coalicion, automaticamente MEP-POR-RED ta sostene e leynan y maneho di e Ministernan den Gabinete. Pero como cu awor e no ta representa ningun partido, e por yega na un situacion den cual POR no ta sostene un cambio y si MEP sostene toch, cu ainda lo por topa cu retonan den coalicion. Ta un scenario cu nunca antes a yega di topa den politica na Aruba, pero mescos cu Coronavirus a siña nos, kisas esaki ta bira parti di e “normal nobo” den politica.
No por keda sin señala e hecho cu esun cu a ricibi e sla politico mas duro den e impasse aki ta mr. Andin Bikker. E comentarionan tur tabata negativo pa e forma con el a presenta e problema publicamente den un conferencia di prensa. E lesamento di e carta cu a skirbi pe y e argumentonan cu el a purba hustifica e retiro inmediato di Marisol Lopez for di su funcion di Minister. Tabata evidente cu prome el a purba halsa su mes, dor di yama su mes un mediador y trahado di brug, etc. Nada di esey no a yuda drecha e percepcion den comunidad cu e tin un nivel halto di arogancia. Esunnan mas yega na dje ta bisa cu no ta ni reconoce mas, pa e forma con el a wordo domina dor di Otmar Oduber.
Di otro banda, a nota cu mesora e popularidad di Marisol Lopez a crece den comunidad. Specialmente pasobra ni con a purba hustifica cu e no ta un “team player”, cu e no ta contesta su mensahenan di whatsapp, etc., toch mayoria ta opina cu e ta haciendo tur su best pa mehora e situacion cu el a hereda na Serlimar, entre otro. Ningun hende ta culp’e di e desaster financiero cu tin na Serlimar, specialmente pasobra e problemanan tabata conoci di masha tempo y tur hende sa ken a ocasion’e tambe. Hasta tin hende ta sinti cu como e ta haciendo un “opruiming”, cu awor mester core cu ne prome cu e topa cu berdadnan cu no por mira luz di dia.
Ta notando un ansha y panico pisa na Serlimar, specialmente den e Hunta di Supervision, cu tabatin e tarea pa supervisa e compania y e director. Ta parce cu a sinta man crusa laga e barco sink y awor tur ta purba culpa otro. Diripiente informacionnan ta saliendo tras di otro y ta poniendo presion enorme internamente pa sea purba saca documentonan of sconde documentonan. Mescos ta nota cu e mesun directiva ta bisa un cos y despues ta hala nan palabra atras, subrayando e maneho cu a hiba e ultimo añanan cu a causa e desaster cu a keda atras awor, cu tin cada un nan nomber bou di e logro aki, esta pa manda un compania estatal den bancarota!
