Diasabra anochi alrededor di 10:43pm a sosode un accidente pisa riba e caminda di Piedra Plat direccion Sero Pita. A spacha varios unidad di Polis y no menos di 3 unidad di Ambulance y Materialenwagen di Brandweer debi cu a menciona cu tin victima pega den auto. Masha lihe a tuma nota cu un di e chauffeurnan no tabata duna señal di bida.
E accidente tabatin tres auto envolvi; Un auto marca Nissan modelo March color blanco, numera A-31587, a duna señal pa e bira na man robes di caminda, mientras cu un otro auto marca Suzuki modelo Swift color blauw, numera A-37161, cu e Polis na civil tras di stuur a pas’e den banda y consecuentemente a bay dal frontal den un otro auto marca Nissan modelo March, color licht biña, numera A-71465. Na e sitio Bomberonan mester a corta un auto pa libera un victima.
Chauffeur di e Nissan March den cual e Swift a dal frontal, a bay den Ambulance pa Hospital den un situacion hopi delicado. Lamentablemente, chauffeur di e Suzuki Swift, esta e agente di Polis, Leonard Anthony Boekhoudt, naci na Aruba dia 27 October 1985, no tabata duna señal di bida. Pa 11:25pm Dr. Texier a constata su morto na e sitio mes.
E agente di Polis ta basta hoben den Cuerpo Policial y tabata traha den districto di San Nicolas. E ta tata di tres yiu. Paz na su restonan. Hopi forsa na famia y na henter Cuerpo di Polis den e momento dificil aki.
