No ta un sekreto ku Kòrsou ta konfrontando retonan grandi den sektor laboral. Diferente retiro na diferente kompania ,un tras di otro, ta krea un desbalansa den nos sektor sosial i ekonómiko ku konsekuensianan tambe riba tereno físiko i emoshonal.
Konhuntamente nos mester kuminsá pensa i evaluá nos sektor laboral den un
forma mas skèrpi i buska solushonnan den un forma mas efektivo i produktivo.
Ta mas aktivo i rígido ku e proseso di evaluashon pa gerensianan di kompanianan
di gobièrnu pero tambe privá pa di e forma aki trese mas transparensia i kalidat den maneho entre gerensianan i trahadónan i alabes salbaguardiá durabilidat di kompanianan.
Komo representante di pueblo nos ke aportá ku e idea pa krea un plataforma di transishon entre gobièrnu i sektor priva pa purba evitá ku e trahadó ta kai for di e proseso laboral i asina ta limitá e trahadó di sigui kumpli ku su responsabilidatnan familiar, sosial i laboral.
Un plataforma kaminda ministerio di Desaroyo Sosial, Labor i Bienestar
,komo trèker, ku partisipashon di diferente sektor den nos sosiedat manera bankonan, seguronan, sindikatonan, kompanianan di utilidat, hotèlnan i haf pa menshoná algun. Di e forma aki gobièrnu, komo trèker, tin un bista mas real di e posibilidatnan di trabou ku e diferente sektornan ta ofresé i asina por krea perspektiva pa trabou sea den mes un ámbito of un area di trabou nobo pero
tambe ta duna e sosten moral i kontinuashon na e ser humano afektá pa por
sigui funshoná i asina permanesé den e sírkulo laboral.
Basa riba e puntonan di preokupashon ariba menshoná nos ta hasi uso di artíkulo
96 di Reglamento di Órden pa hasi minister e siguiente preguntanan:
- Minister por informá Parlamento kua ròl ministerio di Desaroyo Sosial,
Labor i Bienestar tin den e totalidat ora retironan tuma lugá?
- Ministerio o gobièrnu tin un of mas departamento ku ta atendé i asistí e trahadó durante e periodo i despues ku retiro tuma lugá?
- Den ki forma(nan) gobièrnu ta informá pueblo kiko ta e trayekto pa kana tantu promé komo ora retiro for di trabou tuma lugá?
- Tin un interkambio ministerial entre ministerio di Desaroyo Sosial, Labor i Bienestar i ministerio di Finansa ora e último aki konstatá ku tin un kompania ku su finansa ta di tal índole ku esaki por redunda den retiro di personal?
- Si e kontesta ta negativo kiko por hasi pa e interkambio aki bira viabel i tuma lugá?
- Ministerio di Desaroyo Sosial, Labor i Bienestar tin un bista di e kantidat real di vakaturanan pa trabou den nos komunidat?
- Kon efektivo banko di vakatura di gobièrnu ta den e proseso pa yena e kuponan di trabou i asina baha desempleo?
- Kiko minister su opinion ta den krea un plataforma di transishon entre gobièrnu i kompanianan priva komo un método adishonal pa kombatí e desempleo kresiente manera sugerí?
- Si tin un plataforma asina of paresido aktivo dikon e no ta mas visibel den komunidat?
E situashon di desempleo i inseguridat ku esaki ta trese ku ne ta un situashon ku nos no mester ignorá ni balotá sigur teniendo kuenta ku tin diferente aspekto personal ku ta wòrdu influensia kreando espasio di frustrashon i intrankilidat pa e siudadano direktamente afektá i esnan rondó di dje.
Ta nos tur su deber di salbaguardiá i mantené trankilidat den nos komunidat.
Mirando e urgensia di e situashon nos ta gradesí minister pa e kontestanan den un tempu korto.
