Un persona cu ta huma y ta sufri di complicacionnan di pulmon ta mas vulnerabel pa contrae Covid-19

Departamento di Salud Publico (DVG) ta informa cu un persona cu ta huma, y si e tin problema di pulmon, ta bira mas vulnerabel pa keda infecta cu Covid-19.

Ora di huma, e dedenan ta den contacto cu e lipnan y esaki ta aumenta e posibilidad di transmision di e virus di bo dede pa bo boca.

Esnan cu ta huma por tin malesa of problema respiratorio existente, loke ta aumenta e riesgo pa sufri un caso severo di Covid-19 den caso di bira positivo.

Pero tambe humamento di productonan manera hookah of humamento den grupo, ta encera un acto social unda hendenan nan ta comparti dispositivo bocal pa huma, cual por facilita e transmision di Covid-19. P’esey DVG ta haci apelacion pa tene cuenta cu e aspectonan aki. Huma no ta bon pa salud, pero den e temporada di e virus aki ta bira mas peligroso ainda.  Sea responsabel, cuida bo mes y cuida otronan.

#HuntoNosPorStopEAtrobe