E Venezolano Luzmary Pineda a hiba un lucha largo. Tabata dos luna y mey cu e ta lucha cu Trudy Hassell di Guarda Nos Costa.
No ta un secreto cu Hasselle ta abusa di su poder, si mira tur e denuncianan publico haci contra dje. El a menasa Luzmary cu e lo detene, e lo yama aeropuerto na Aruba of ora e yega Hulanda, pa nan no lag’e sali. Un di su yiunan ta deteni na Guarda Nos Costa y esaki tabata e miedo cu e tabatin, segun el a comenta na 24ora.com
Trudy a bis’e cu e lo yama inmigracion di Hulanda y pa despues nan deport’e pa Venezuela. Luzmary a menciona cu e tin hopi miedo pasobra na Aruba mes, el a mira un noticia di un Venezolano horca y e ta teme pa bida di su yiu, mirando cu Trudy a menas’e asina tanto.
E tin audio cu e por a graba Trudy den dos ocasion. E ultimo Trudy a menas’e un biaha mas cu lo bay detene Luzmary y lo mande bek Venezuela.
Luzmary a comenta cu e no por drenta Venezuela y Trudy sa esey masha bon. E tin un permiso di trabao cu nan no a renoba. El a cansa di warda riba un contesta for di Dimas y te asina leu e permiso no a keda renoba. Pa e motibo ey el a tuma e decision pa bula bay Hulanda.
E sufrimento cu e tin ta e miedo cu e tin riba e isla, mirando e situacion economico. E tin mester siguridad cu nan lo a entrega su yiu bibo, sano y salbo, pa e sali for di Aruba, mirando cu e no a haya un contesta di gobierno.
E sa cu e isla ta chikito y mirando cu e no tin un contesta, e mester bay. Su yiu muhenan ta yen di miedo, door cu nan no ta mirando nan ruman.
Loke Luzmary tabata warda ta Guarda Nos Costa pa trece su yiu, pa nan tur coy un avion y bay Hulanda. Hasta e tin un funcionario di Guarda Nos Costa graba, unda cu e ta bisa cu ta normal cu ora e mes ta na aeropuerto, e funcionarionan ta trece su yiu p’e.
Consciente di e leynan
Luzmary tin e opcion di sea bay Venezuela of cualkier otro destinacion. Sinembargo su yiu si no por. Mirando cu el a presenta su prueba di e problemanan cu el a haya na su pais, el a ricibi un permiso, caminda poco hende tin esey. E grupo chikito cu tin’e ta pasobra di berdad nan a demostra unda nan a traha na Venezuela.
Na caminda pa Hulanda
Su destino awor aki ta Hulanda y despues e tin pensa di yega Spaña unda cu e tin famia eynan. Pero prome cos aworaki ta su prome destino apesar di e menasanan di Trudy, kende ta para riba cu e tin hopi poder. Awe e mester a yega Hulanda. Tur loke e kier ta na paz caminda cu Trudy no por yega na dje.
Mal uzo di influencia
Trudy a duna Luzmary varios opcion pa e sigui su caminda, pero Luzmary no tin suficiente placa pa e cumpra otro pasashi. E decision aki e no a tume su so. El a pidi conseho cerca coordinadornan di e propio minister. Tambe e tin prueba di esaki. Luzmary ta para riba cu tur loke el a menciona e no a inventa. E no a afera na Hulanda pa nan yud’e den nada. No ta manera cu Trudy Hassell ta pensa. Luzmary no conoce Hulanda. Sinembargo e kier bay for di Aruba y ta sigur pa no tin persecucion policial.
No por bay Venezuela
No ta un secreto pa ningun hende di e situacion na Venezuela. Luzmary ta conta cu e tin dos yiu cu ta malo, uno cu epilepsia y uno cu autismo y eynan no tin remedi. Venezuela e no por bay, no cu e no kier. Sino cu e no por, mirando e situacion cu tin eynan.
Persecusion
Apesar di e caminda di cruz cu el a cana, toch e ta gradicido na hopi hende cu a brind’e apoyo. Pero e persecusion cu Trudy Hassell, no ta normal.
